Ayera mainta durante un conferencia di prensa di Haime Croes, Director di Directie Infrastructuur en Planning (DIP) a duna di conoce cu awe nan ta bay haci un charla informativo di pre-reservacion di aña 2010, 2011 y 2012.

Croes a splica cu ora el a drenta den departamento december pasa, el a haya un situacion hopi caotico na unda cu nan, hunto cu minister Otmar Oduber, a dicidi di planifica Aruba y un di e basenan pa esey ta den ROP, pa defini luga na unda por construi cas den zona cu ta forma parti di sector turistico.

Den area aki, Croes a señala cu a mira e retraso cu nan tin cu recupera, locual tabata e prioridad di Gobierno basa riba e hecho cu hopi hende tabata grita pa cas, y e otro banda ta unda tin cu traha patras y tin cu mira pa futuro.

A base di esey, a bin e maneho cu a wordo stipula den cuadro ROP, na unda cu ta mira a base di e regla aki, ta bay tuma te aña 1992. Pa motibo cu nan a haya un retraso desde e aña ey te cu 2007 y awor nan ta na 2019 y tin cu keda wak e realidad, cu mester atende cu henter e parti di atraso. Den esey a wak dos trayectorio, na aña 2017 nan a haya cu nan tin mas cu 14.400 hende a pidi tereno pa construccion di nan cas.

Tambe, Croes a expresa cu como DIP ta mira cu e problema ta cu no ta pa reparti tereno sino pa e parti di vivienda. Esey ta un problema cu mester soluciona y e instrumento cu tin ta e parti di erfpacht, nan tin cu zorg pa tin’e.

Parti di esey, Croes a manifesta cu nan a mira e cantidad di peticion cu tin y nan a dicidi a base di e maneho aki kico ta e reglanan, ki momento hende ta bin na remarca y asina tur hende tambe por sigui e mesun linea. Importante ta, manera el a menciona, cu ultimo añanan a haya hopi critica, specialmente di departamento di DIP.

Den a cuadro ey, el a bisa cu di e 14.400 peticion cu atraso, na luna di mey di 2018 te awor nan a yega na un total di 7.400, di cual 3.900 hende no a haya tereno pa varios motibo: fayecimento, no ta inscribi na Aruba of tin un cas of tereno caba.

E cantidad cu a resta, cu ta 3.500, ta cumpli cu tur e regla y por bin na remarca pa un cas, Croes a comenta cu DIP a duna pa nan e chens pa pidi un pre-reservacion y base di e cantidad ey, mas cu 50% a bay pa FCCA, door cu nan condicionnan ta pidi cu nan mester di un entrada maximo di 144.000 florin.

Actualmente un cantidad di casi 2.000 hende ta den proceso, segun Croes a splica y den base di esey nan a pronostica cu tur cos ta bayendo bon y e cifra cu a resta aworaki, teniendo na cuenta 2018 cu 2019, tin un total di 7.800, cu den aña cu ta bin nan kier hal’e pa por yega den aña 2020 pa 0.

Tambe el a expresa cu desde aña 1992 te awo tabatin hopi hendenan grandi cu mester tabatin nan tereno pero door di edad nan ta cay y el a informa cu DIP ta preparando proyectonan cu nan por asisti na remarca pa un cas.

Di mesun manera, Croes a informa cu nan tin cu cuatro proyecto, un na San Nicolas unda cu nan por introduci esey pa e hendenan y cu nan ta convenci a base di loke nan tin den e proximo 5 pa 10 aña lo ta keda cu edificionan ta atractivo pa e hendenan.