Awe den cuadro di Dia Internacional di e Pueblo Indigena di Mundo, fundacion Rancho ta organisando un evento educativo y social na Schelpstraat 42 na haltura di e forno di calki.

E ta un actividad varia, ya cu for di 4’or atardi tur persona interesa lo por bishita e exposicion di Caribbean Ties cu ta tumando luga na Museo Arkeologico, situa cerca di e epicentro di e actividad cu fundacion Rancho ta organisa pa conmemora Dia Internacional di e Pueblo Indigena di Mundo. Presidente di e fundacion Rancho, Clifford Rosa, a declara na Bon Dia Aruba cu riba e dia aki nan kier pone accento riba e fecha cu Nacionnan Uni a declara Dia Internacional di e Pueblo Indigena di Mundo na 1982. E meta tras di esaki ta pa reflexiona riba importancia di pueblonan indigena mundialmente pa asina conbibi cu nan cultura.

Rosa a remarca cu pa algun añanan caba e fundacion aki ta bin estrecha e lasonan cultural y te hasta comercial entre Aruba y Guajira cu ta e cuna di e cultura di e indjan Wayuu. “E ta e pueblo indigena mas cerca di Aruba,” el a bisa.

Despues for di 5:30 atardi te cu 7:30 anochi lo tin un programa di charla, musica y gastronomia. E linguistanan Ramon Todd Dandaré y Joyce Pereira lo presenta un charla tocante lenga indigena. Un pregunta cu a inspira e charla aki a bin for di e mesun presidente di fundacion Rancho: Papiamento tambe ta un lenga indigena?

Durante un declaracion duna na Bon Dia Aruba, e linguista Todd Dandaré a relata brevemente e contenido di nan charla cu ta mustra uno hopi interesante y singular. Nan lo papia tocante e lenganan indjan den general y nan presencia actualmente den henter mundo.

Pereira lo enfoca riba pa kico Unesco a implementa pa bin cu un dia special dedica ta e topico aki cu ta awe. Den dje nan lo papia tocante e lenganan indigena di nos continente y naturalmente nan lo referi na Caquetio.

Tambe nan lo realisa un ehercicio cu un miembro di e comunidad Wayuu di Guajira estableci na Aruba. Nan lo trece algun frase den nan lenga Wayunaiki y tambe na Papiamento pa asina wak e diferencia entre ambos lenga. Pero tambe e comparacion entre Papiamento y Carboverdiano.

Igualmente biblioteca Rancho lo expone su di bukinan tocante La Guajira (Colombia). Lo tin bendemento di buki, cuminda tradicional Wayuu, bolo y bar lo ta bon surti. Lo tin animacion di un grupo musical Vallenato. Tur hende ta cordialmente bonbini.