Awe den oranan di mainta, 8:30 precies ta bay tuma luga e tratamento di e caso di R. Vos, ken a keda deteni for di 22 di maart ultimo na KIA. Vos tabata fungi como polis den Cuerpo Policial di Aruba y e ta sospecha di a comete varios delito.

Delitonan: Apropiacion ilicito intencional di portofonnan y/of cargadornan, di viola secretonan cu e tabata obliga pa tene como agente policial, di tuma regalo of promesa y di participacion na un organisacion criminal.

For di dia cu Vos a keda deteni, el a bay KIA directamente, debi cu esey ta e maneho pa proteha e investigacion. Su caso tabata hermeticamente cera na unda Ministerio Publico no a duna mucho detaye di su detencion, pa motibo cu e caso ta compleho y tin hopi aparato y hende involucra, incluyendo periodistanan cu a ricibi informacion via operacion di Vos.

Dia 7 di juli ultimo, Vos di 51 aña di edad a presenta dilanti hues pa trata su caso pro forma. Na e momento ey, fiscal a splica cu e investigacion no tabata cla, sino cu por dura al menos tres luna mas, y cu mester laga Vos deteni pa evita cu e por stroba e investigacion. Na e momento ey a logra habri un di e laptopnan cu a confisca den entrada hudicial na su cas, cual tabatin informacion cu a compromete Vos den e caso aki.

Na e momento ey, abogado di Vos a pidi hues pa suspende e detencion preventivo, mirando e situacion personal di famia di Vos – e tabata e unico cu tabata provee pa su famia y awo su salario a stop y no tin entrada. E tin dos yiu cu tin problema psicologico. Sinembargo, hues a rechasa e solicitud despues cu fiscal a splica cu door cu mester scucha mas hende, si Vos sali, e hendenan en cuestion no ta bay papia mas.

Dia 21 di september ora e caso proforma a tuma luga, fiscal di Ministerio Publico a pidi hues pa interoga cinco periodista di diferente medio di comunicacion di Aruba. Den e tres laptop confisca a haya posibel mensahenan entre e acusado y e reporteronan sospechoso, cu ta demostra cual informacion confidencial a sali riba rednan social.

Segun hues, e cinco periodista aki mester ser confronta cu e contenido di e dossier y ya a interoga nan caba. Pa esaki, fiscal a prefera pa hiba e caso na Hues Comisario pa por cuestiona e cinco reportero den cuadro cu reglanan.

Defensa a cuestiona pakico no a detene y cuestiona e reporteronan den e periodo entre juli y september. Normalmente ta warda pa investigacion conclui pa por sigui cu e cuestionamento di sospechoso, pero pa esaki, OM a dicidi awo di tuma un otro orden di maneho, esta no warda pa e analisis di e laptopnan y continua numa cu e cuestionamento di e reporteronan.

Pa esaki, defensa a puntra pakico esaki tabata tumando luga na september y no dos luna prome. E abogado a subraya cu OM tin experencia pa loke ta trata tipo di casonan asina, pues tabata sa di antemano caba cu e proceso lo dura basta tempo. Tambe a puntra pakico no a usa e informacion analisa di e prome laptop, den cual supuestamente a haya 9000 mensahe cu por a usa pa cuestionamento.

Abogado di Vos a pidi un schorsingsverzoek, debi cu Vos tabata mantene den detencion cu inkietud tocante e trayectorio di e caso. Ademas a subraya e situacion financiero y familiar di e acusado, den cual a menciona e dificultadnan cu e yiunan y esposa ta experenciando debi na salud mental y falta di entrada.

Den e argumento di OM, fiscal a splica cu e proceso pa habri y analisa laptop no tabata uno facil y cu esaki ta tuma basta tempo. E motibo pa e duracion di e proceso aki tabata pa un supuesto falta di capacidad. Debi na esaki, OM a pone den carta cu e tempo ey tabata e momento pa manda e caso directamente na hues comisario pa cuestiona e otro sospechosonan.

Pa locual ta e argumento di schorsingsverzoek, OM a declara cu no tin fondo pa e peticion aki, ya cu no tabatin inkietud mas pa loke ta trata e trayectorio di e caso, mirando cu a opta pa bay den un otro direccion. Segun OM, e opcionnan nobo cu a habri debi na e decision aki lo resulta cu e caso no lo dura hopi tempo mas. Pues pa esaki, e fiscal di OM a pidi pa procesa e caso dia 8 di december 2023 y pa manda e caso directamente na hues comisario.

Na fin di e sesion aki di september, hues a bay di acuerdo cu e fiscal y a dicidi pa manda e caso na hues pa cuestiona e cinco sospechoso y pa e caso continua riba 8 di december 2023.

Pa loke ta trata e schorsingsverzoek, Hues a declara cu esaki no ta na ordo, mirando cu e actonan cometi pa Vos ta uno basta serio.