Awe Corte di Casacion na Den Haag ta dicta veredicto den caso di matrimonio igualitario

Awe Corte di Casacion na Den Haag ta duna su veredicto den e casonan di Aruba y Corsou tocante e apertura di matrimonio pa parehanan di mesun sexo. Pa Aruba ta trata di e caso di Fundacion Orguyo contra Pais Aruba.

Den luna di december 2022, Corte Comun a dicta dos sentencia relaciona cu casonan di parehanan di mesun sexo, un na Aruba y un na Corsou, caminda e veredicto final a indica cu parehanan di mesun sexo por casa na ambos isla.

Despues di e veredicto aki Gobierno di Aruba a tuma decision pa bay den Casacion. Mr. Jan Paul Heering a representa Gobierno di Aruba durante e tratamento di e caso den Corte di Casacion na Den Haag ken principalmente a presenta obhecionnan legal formal, enfatisando cu e huesnan di Corte incorectamente a asumi e rol di legislador.

Mr. Mirto Murray, mr. David Wever y mr. Ton Vermeulen a representa gruponan defensor di derechonan LGBTQI+ a traves di Human Rights Caribbean Foundation y Fundacion Orguyo Aruba. Nan a argumenta cu tin “discriminacion sistematico” di gobiernonan di Corsou y Aruba, haciendo parehanan di mesun sexo “ciudadanonan di segunda clase” sin e mesun derechonan cu parehanan casa.

Inicialmente e veredicto tan spera pa e caso aki mester a tuma luga dia 31 di mei, pero Corte di Casacion a tuma e decision pa hala esaki pa e fecha di awe.

Na Aruba e ley di apertura di matrimonio pa parehanan di mesun sexo a wordo trata den Parlamento. E prome biaha cu esaki a tuma luga e ley a keda pega, pues tabatin 10 voto na fabor y 10 contra y un parlamentario a abstene di vota.

A programa un segundo fecha pa tratamento di e ley y durante e segundo reunion publico aki e resultado tabata mesun cos, 10 voto na fabor, 10 voto contra y un abstencion di voto, loke na final a hiba na rechaso di e ley.

Opinion publico tocante e tema aki entre ciudadanonan ta dividi. Di un banda tin esnan cu ta apoya e comunidad LGBTQ+ y cu ta boga pa igualdad den tur forma y di otro banda tin e esnan cu ta apoya e partido religioso y ta completamente contra pa e ley aki pasa.

Expectativanan ta halto pa e veredicto di awe y den caso cu esaki ta uno positivo pa e comunidad LGBTQ+, por tuma pasonan pa entrega e ley di nobo y busca un resultado diferente.