Diasabra mainta, e vocero di e bloke sindical di sector publico (SADA, SEPPA, TOPA, SPA y SIMAR), Edward Maduro a declara cu diabierna ultimo nan a tene un reunion cu gobierno pa atende cu asunto di indexering.

Durante e reunion aki, gobierno a haci un presentacion di nan propuesta cu e sindicalista Maduro a abstene di papia di dje, te ora cu nan no ta trece prome cerca nan miembronan.

Den e reunion e sindicatonan a bin haya e prome propuesta di gobierno, y awe e sindicatonan ta bay tin un reunion importante den e seno di e sindicatonan, unda mester cay un decision con nan mester sigui atende cu e asunto aki. Pa mañan caba eventualmente e lo por vocifera un posicion di e bloke sindical riba e propuesta cu gobierno a haci.

Evaluacion y accion.
Nan ta haciendo evaluacionnan riba e proposicion ultimo di gobierno, y awe nan ta reuni merdia pa analisa y bin cu un posicion riba dje. Maduro a declara cu como sindicato nan tin cu cumpli cu nan banda y cu nan miembronan. Cada sindicato tin cu atende cu nan miembronan y wak kico ta e posicion di nan.

Prome cu nan no tin nan reunion, vocero di e bloke sindical no por bisa si nan ta sali disgusta of no di e proposicion cu gobierno a haci. Tampoco nan no por papia di accion, mientras cu nan ta sinta na mesa negoshando cu gobierno. E intencion ta si nan por haya un solucion na mesa.

Sinembargo, e decision aki ta bin for di nan miembronan si na final di dia nan ta dicidi di bay den accion of no. Como directiva nan no ta dicidi ariba nan mes si ta bay den accion of no, sino e miembronan ta dicidi esey.

Protocol y presupuesto.
Pero tampoco nan no a spera cu propuesta asina di parti di gobierno, despues di casi 8 luna cu e sindicatonan no a haya nada, y niun contra proposicion di gobierno.

“Nos tabatin pensamento si, cu locual gobierno kier bin cune no ta mucho alentador. Pero tin puntonan cu ya caba nos no ta mucho di acuerdo cune,” el a declara.

P’esey unabes cu nan reuni den nan seno y bin cu un posicion pa medio di un contra propuesta, di biaha nan lo informa gobierno pa sinta na mesa pronto y no warda dos siman mas, manera den su carta gobierno ta propone. Aunke el a abstene di bay den detaye, pero e tin cu bisa cu despues di casi 8 luna cu nan ta pidiendo gobierno un indexering di 3.6% cu ta e cifra di inflacion di CBS durante aña di 2018. Pero gobierno di su banda a trece dilanti e protocol cu a firma cu Hulanda, unda nan a compromete cu e gasto di personal no mag di surpasa 469 miyon.

Maduro a lamenta cu gobierno no a tene cuenta cu e parti di indexering na momento cu a firma e protocol na 2018, y gobierno mes a admiti esaki, segun e sindicalista. Esaki a pone cu gobierno no tin espacio den nan presupuesto, manera gobierno a yega di indica varios biaha den nan maneho pa loke ta trata indexering.

Sinembargo Maduro a laga sa cu nan kier atende asunto di indexering prome cu gobierno lo entrega su presupuesto 2020 na Parlamento. Maduro a bisa cu durante e reunion, gobierno no a haci un presentacion riba presupuesto 2020 pa muestra nan cu no tin espacio financiero. Sino cu den e reunion gobierno a bin cu e propuesta cu tabatin y nan a papia over di dje. Y esaki gobierno a entreg’e pa medio di un carta.