SALT LAKE CITY- Ayera den oranan laat, mayornan di baby Lunah a haya e yamada cu nan tabata tin lunas ta spera riba dje. Awe mainta Lunah lo wordo interna pa asina por haci operacion di curason.
Durante e procedemento lo catheterisa su curason. Esaki nifica cu lo hinca un catheter den un ader of chamber di su curason. Prome cu tur esaki por tuma luga, baby Lunah lo mester pasa algun examen.
Historia di Lunah
Lunah ta un baby cu a nace cu abnormalidad genetico conoci manera Trisomy 18 of T18. Tambe e ta ser yama Edwards syndrome, cual nomber ta bin di e dokter cu a describi esaki pa prome biaha. Un trisomy nifica cu e baby tin un extra chromosome den algun of tur di su celnan di curpa. Den caso di trisomy 18, esaki nifica cu e tin tres copia di e chromosome number 18. T18 ta causa cu entre otro e organonan di e baby no por desaroya na un forma ‘normal’.
Desde cu mayornan di Lunah ta consciente di kico nan yiu tin, nan a cuminsa cana caminda pa busca salud di nan yiu. Esaki a nifica pa nan un trayectoria caminda mester laga tur cos atras na Aruba y bay biba na Merca, igual cu bringa nos seguro nacional AZV den corte, for di cual recientemente nan a gana nan caso, cual ta haci e operacion di awe posibel.
