For di dia cu Aruba a haya su status aparte na 1986 e isla a haya su mesun militarnan yama Arubaanse Militairen (Arumil) y for di 1997 nan ta celebra cu nan a bira un vrijwilling, for di e momento ey nan a scoge un fecha pa celebra e cual ta dia 7 di april.
Como parti di e celebracion aki cu nan a cuminsa den Marinierskazerne cu un acogida hopi grandi di comunidad segun loke Mario Brizen, sargento-mayor a señala, pero debi cu hendenan no por djis drenta den Marinierskazerne e aña aki nan a dicidi di haci un dia di deporte pafo di Marinierskazerne unda cu pueblo por presencia full e actividad aki caminda diferente ekipo ta bay competi cu otro na ex-tereno di Bushiri Hotel.
Den e evento cu ta publico pa tur hende y gratis, e participantenan ta bay tin diferente obstaculonan y reto, pa lo cual nan ta bay demostra nan forsa y dureza competiendo den solo.
Tambe el a sigura cu ekiponan a wordo informa algun siman atras tocante e organisacion di dia di deporte, igualmente nan a experencia esaki aña pasa segun Brizen ta declara y cada ekipo lo entrega personanan cualifica pa haci e evento aki “mi ta sigur cu e lo bira un exito,” el a comenta.
Awe 5 di april pa 1or di merdia e competencia entre dos ekipo ta bay cuminsa y lo continua aproximadamente te 5or di atardi segun Brizen a informa, despues lo sigui cu entregamento di premio y for di 6or te cu 9or lo tin e celebracion mes di Arumil na e mesun luga unda pueblo lo por disfruta di esaki.
“Idea ta pa pueblo bay apoya e ekiponan y tambe pa crea e tipo di eventonan aki pa ekiponan por conoce otro, tin bon relacion cu otro, pero tambe pa pueblo presencia con nan ta competi,” Brizen a bisa.
Nan ta purbando di fortalece nan rol den comunidad segun loke Carlos Buera ken ta ayudante den esaki a bisa “nos ta para pa pueblo, si tin calamidad of na momento di defensa nos como militar Arubiano ta para pa nos isla,” el a sigura.
E ekiponan cu ta bay competi awe ta conforma pa polisnan, CEA, KIA, entre otro organisacionnan cu a invita pa forma parti y fortalece e cadena hudicial.
