ORANJESTAD – Aruba ta e pais anfitrion di e di 15 seccion di e comision inter-gubernamental Oceanografico di Unesco (IOC) su region di Caribe (IOCARIBE), cu a inicia awe mainta cu presencia di Gobernador di Aruba, Sr. Alfonso Boekhoudt. IOC ta un organismo cu autonomia funcional denter di UNESCO, ta e unico organisacion competente destina pa e ciencia marina denter di e sistema di Nacionnan Uni. Mas di 33 representante di region Latino America ta presente pa trata temanan di interes comun riba conservacion di lama.

Sr. Marck Oduber a keda apunta pa minister Rudy Lampe pa atende cu e conferencia aki. Ayera el a declara na Bon Dia Aruba cu e reunion inter-gubernamental ta inicia awe y ta culmina diabierna dia 10 di mei awor. “E ta un evento hopi grandi; y mi ta kere cu ta prome biaha cu Aruba ta organisa un evento grandi na nivel internacional pa ciencia oceanografico,” el a bisa. E ta mira cu esaki ta un honor pa Aruba organisa un conferencia di e caliber aki.

Nan ta cuminsa e conferencia internacional di ocean cu diferente topico y participacion di expertonan riba cada topiconan trata. Den e conferencia aki ta conta cu e presencia di un delegacion di alrededor di 40 persona. Mañan nan ta sigui delibera riba otro topiconan di interes di IOC, pa asina stipula e maneho den e proximo añanan pa e region Caribense, Latino Americano, Centro America y Merca.

E proposito di e IOC ta esun di promove e cooperacion internacional y coordina programanan di investigacion, servicionan y desaroyo di capacidad pa siña mas riba naturaleza y recursonan di ocean y zona di costa. Tambe pa aplica e conocemento para la mehora e maneho di desaroyo sostenibel, proteccion di medio ambiente marino y proceso di tuma di decision di nan estadonan miembro.

Di awe te cu diabierna nan lo trata tres tema principal. E prome ta consisti di sargassum, otro alganan y derame di azeta su impacto den nos region. E di dos tin di haber cu coral reefs, biodiversidad y cambio climatico. Y e di tres acidificacion di Ocean.

E proceso pa Aruba bira sede di e conferencia aki a start durante e ultimo reunion di IOCARIBE, cu a tuma luga na Colombia. E biaha ey minister Mike de Meza a bay di acuerdo pa organisa e conferencia aki na Aruba, ya cu e lo yuda pa eleva nos conocemento cientifico y tambe pa fortalece e lasonan di UNESCO cu nos pais.

Igualmente, na momento cu gobierno a cambia, minister Rudy Lampe a mustra su interes como esun encarga di enseñansa, ciencia y desaroyo sostenibel a haya cu e ta un conferencia internacional maha importante pa Aruba. Specialmente pa crea vinculo riba e parti di conocemento maritimo.