Dia 1 di juli, Aruba ta conmemora 160 aña di Abolicion di Sclavitud den Reino Hulandes. Pa e conmemoracion historico, aki minister di Cultura ta invita comunidad den general pa un acto awe mainta for di 8:00 pa asina reflexiona riba e parti di historia di Aruba den Reino Hulandes.
Esaki ta prome biaha cu un acto asina ta bay tuma luga, manera el a menciona. Akinan ta conmemora e di 160 aña di Abolicion di Sclavitud den Reino Hulandes y pa e motibo ey nan ta bay haci un acto di conmemoracion pa reflexiona riba e parti di historia comparti aki.
“Aruba tin su historia unico pa loke ta trata e historia aki di sclavitud y p’esey nos ta purba di trece programanan pa conscientisa pueblo riba e parti akinan pero sigur riba e dia aki,” minister Maduro a sigura.
Esaki ta bay tuma luga awe 1 di juli riba e plenchi dilanti Museo Arkeologico Nacional di Aruba for di 8:00 te cu 10:00 di mainta na unda a invita comunidad den general pa asisti na evento aki. Ta bay tin momentonan di reflexion, ta bay recita poemanan y pa exactamente 8:27 di mainta lo transmiti e discurso en bibo di Su Mahestad Wilhem Alexander cu tambe ta bay duna un discurso na Hulanda.
Ademas, minister Maduro ta informa cu na vispera di e conmemoracion di 160 aña di abolicion di sclavitud den Reino Hulandes, Ministerio di Cultura ta presenta un otro programa informativo yama ‘Papiamento: herencia cultural di sclavitud’ den cuadro di un serie di programa pa informa comunidad riba historia di sclavitud di nos Pais.
E historia di sclavitud na Aruba no ta mucho conoci y p’esey como parti di e formacion di propio identidad ta importante pa pueblo haya sa mas di e parti menos bunita aki di e historia di e pais y di Reino Hulandes.
Na Aruba tambe tabatin esclavo, aunke na un cantidad menos cu na e otro islanan di Reino Hulandes na unda tabata tin negoshi di benta di esclavo y plantacionnan grandi unda esclavonan tabata traha. Segun investigacion haci, e esclavonan na Aruba tabata traha na cas, den tienda di nan doñonan, como cuidado di bestia of den cunucu. Na aña 1863 na momento di e emancipacion di esclavo, un cantidad di casi 500 esclavo a logra haya nan libertad na Aruba. No obstante cu esaki ta un cantidad limita, e ta parti di historia di sclavitud na Aruba.
Varios investigacion riba sclavitud na Aruba
Tin varios experto cu a haci investigacion riba sclavitud na Aruba y riba historia colonial cu a resulta den documento, buki y documentario. Minister Maduro ta invita pueblo pa bishita Archivo Nacional di Aruba y Sala Arubiana di Biblioteca Nacional Aruba pa cera conoci cu mas di e historia di sclavitud na Aruba. Na Archivo Nacional Aruba, por ehempel, tin varios storia di esclavo y tin un registro den cual tin famnan cu ta descendiente di esclavo. Un storia conoci ta esun di Virginia Dementricia Gaai, kende tabata un esclavo rebelde y di cual varios famia na Aruba ta descendiente. Na Hulanda a nombra un caya na Rotterdam na su nomber, Virginia Gaaipad.
