Awe Koningin Wilhelmina Fonds (KWF) ta cumpli 60 aña di existencia. Un fundacion cu a nifica hopi pa e pashentnan victima di cancer y pa nan famia. Un fundacion cu tin su derecho di existencia, pero cu tambe tin su reto pa sigui garantisa su servicio vital.

Presidente di KWF, Lilly Prince a declara na Bon Dia Aruba cu e fundacion aki ta mira e di 6 decada aki cu e satisfaccion di por yuda cantidad di hende ora cu malesa manera cancer ta bati nan porta.

Reto financiero

Actualmente nan situacion financiero ta hunga un rol pa nan sigui brinda nan servicionan. Prince a afirma cu bancarota e fundacion no ta, pero nan mester yena e caha pa nan por sigui duna e servicio, manera mester ta.

Nan ta tratando pa want’e, pero por ehempel aña pasa KWF no por a sali pa colecta placa debi na e pandemia. Pero ya caba nan a cuminsa papia cu polis pa mira e posibilidad di subi caya alomenos un biaha na luna di april pa nan por colecta. “Pasobra sino nos no por want’e,” el a declara.

Tambe e aña aki nan mester sikiera bin cu un rifa, pasobra no ta solamente gasto di ayudo KWF ta atende cune. Sino cu nan tin cu renoba e ekiponan cu nan tin manera cama special y rolstoel. Ademas di tur e acesorionan y asistencia cu e fundacion aki ta brinda na e pashent di cancer ora cu nan ta na cas.

“Tur esaki ta costa hopi placa,” el a bisa na e matutino aki. Nos ta papiando di un gasto di ariba 100 mil florin pa aña. Como fundacion nan tin cu mira con nan por traha anualmente e placa ey, pasobra e servicio na pueblo ta gratuito, pero nan entrada ta poco.

 

Nan ta masha gradici na Dios y tambe algun instancia cu aña pasa a duna KWF nan sosten financiero den forma di donacion. Prince a splica cu loke nan a haya di e instancianan ey, pero tambe for di e hendenan cu tur luna ta deposita riba nan cuenta, nan donacion a bira un alivio. Sinembargo loke nan a haya den total, practicamente mas cu tres biaha di e suma ey, KWF ta saca pa cubri nan gastonan.

Mas caso… mas servicio y asistencia

Tempo cu e fundacion aki a wordo lanta, e situacion di cancer na Aruba tabata otro y mas trankil pa KWF. Pero unabes cu Aruba su poblacion a crece y hunto cune e cantidad di persona victima di e malesa aki, nan servicio y trabao boluntario a aumenta. Pero for di nan inicio KWF a duna comunidad Arubiano un confiansa cu tin un fundacion di cancer estableci riba nos isla.

For di añanan 90 te cu aworaki, KWF a haya un rol hopi mas grandi y prominente. Na inicio e tabata un centro di informacion unda e personanan por a haya e ayudo psico-emocional pa confronta e malesa. Pero aworaki nan servicio y ayudo ta hopi mas grandi.

For di añanan 80 nan a cuminsa cu un ‘candela hopi abou,’ manera Prince mes a describi, e ayudo na cas. E ayudo aki no tabata cu un enfermero profesional sino cu un assistent di enfermeria kende tabata baña pashent na cas.

Nan a cuminsa cu WGK prome, pero ora cu e fundacion aki no tabatin mucho personal pa traha, KWF a busca otro persona pa realisa e trabao aki. Desde aña 2000 te aworaki, KWF ta conta cu un team dinamico cu ta duna e pashentnan e asistencia cu nan mester na nan cas mes.

Na 1981 nan a cuminsa cu e campaña di protesis cu brazier, pero e tempo aya e pashent mes a bay un establecimento comercial pa cumpra nan. Pero awendia KWF tin su propio edificio unda nan por brinda e pashent e atencion cu nan mester.

Otro cambio cu nan introduci ta cu e pashent cu mester bay oncologia. Antes ora bo a sali pa hiba un ser keri cerca specialista, bo ta keda mey ora te hasta mas afo, y bo dunado di trabao ta kita e ora ey for di bo salario di fin di luna. E fundacion aki a percura pa evita esaki. Actualmente KWF ta brinda e transporte pa hiba e pashent cu ta bay sea oncologia, radioterapia y/of specialista.

“Tur loke KWF ta haci na comunidad e ta haci’e danki Dios gratuito,” Prince a bisa. P’esey e ta afirma cu Dios tin su man sagrado ariba e fundacion, ya cu sin e ayudo y proteccion di Señor, nan no por a haci e trabao aki. Igualmente e ayudo di comunidad ta vital, ora cu ta bin e parti di donacion, ya cu comunidad ta colabora.

Gradicimento

Na final, Prince den nomber di directiva di KWF ta gradici comunidad di Aruba pa tur e añanan aki di e sosten bon cu e fundacion a ricibi for di nan.

“Nos no ta pidi hopi mas, pero nos ta conta si di esnan cu por corda riba e fundacion aki,” el a bisa. Ya cu na momento cu e malesa di cancer ta bati na porta, y e ta toca un ser keri di bo, e ora ey bo sa kico ta e balor cu e fundacion KWF tin.

Prince a laga sa cu e no ta gaba pa esey, pero si e por bisa cu esey ta loke e ta sinti. Pasobra e mayoria di e ocasionnan Lilly Prince ta convivi cu e persona y su famia e momento dificil ey cu nan ta pasa aden.

E no kier pa niun hende e malesa aki toca na su porta. “Pero nos sa ken su porta e ta toca. Pero nan por sigui conta cu e ayudo y e sosten di Wilhelmina Fonds, unda cu Dios ta duna,” el a bisa.