Chile ta cuminsa vacuna contra coronavirus awe 24 di december, ora ta ricibi e prome cargamento di e vacuna desaroya pa e duo farmaceutico Mericano-Aleman Pfizer/BioNtTech, e presidente Sebastian Piñera a anuncia ayera diaranson.
“Nos kier comparti un bon noticia cu tur nos compatriota pasobra ayera, 5or di mainta, a sali for di Belgica e avion cu ta trece e prome dies mil dosis”, e mandatario a afirma.
E cargamento ta yega den oranan di mainta y na mesun ora lo cuminsa e proceso di vacunacion “di forma gradual”, cuminsando cu personal medico di regionnan di Araucania, Biobio y Magallanes, esun di mas afecta pa e pandemia y algun sanitario di e capital.
Segun e mandatario a informa, tin plania cu otro cargamento cu lo ta gratis y boluntario lo yega otro siman pa continua cu e proceso tanten lo completa 10 miyon di dosis cu Chile tin reserva den laboratorio aki.
Durante e prome seis luna di 2021, Piñera a bisa cu lo vacuna hende grandi y esunnan cu tin malesanan cronico, cu ta representa aproximadamente 5 miyon persona. E resto di e poblacion, cerca di 15 miyon di Chileno, lo por ricibi durante e prome seis luna di 2021.
“Vacuna ta un acto di solidaridad, no ta un decision personal. Ora un persona ta vacuna ta protegiendo su salud pero tambe ta protegiendo e salud y bida di tur esunnan cu ta rond di dje”, el a agrega.
Desde e yegada di e virus na maart, Chile a sostene acuerdonan cu otro laboratorio pa e desaroyo y distribucion di vacuna entre e cual ta destaca e firma Chines Sinovac, e grupo Janssen di Johnson & Johnson y e grupo AstraZeneca den colaboracion cu universidad di Oxford.
Den total, e mandatario a manifesta cu e distribucion di mas di 30 miyon di dosis ta sigura, di e cual lo ta di laboratorio Pfizer y otro dies di Sinovac.
