Manera Minister di Transport, Integridad, Naturalesa y Asunto di Adulto Mayor, Ursell Arends, a indica den un conferencia di prensa anteriormente, awe 2 di mei Aruparking ta drenta na vigor un biaha mas y e biaha aki tin algun cambio chikito pa cu e sistema di parkeer den centro di ciudad.
Durante e conferencia di prensa aki den luna di april, Minister Arends a confirma cu Aruparking ta wordo reintroduci den luna di mei. “E meta ta pa reinicia Aruparking den luna di mei. Ainda falta pa finalisa tur e detayenan di con ta bay reactiva esaki, pero e meta ta den luna di mei ta reactiva Aruparking,” Minister Arends a indica e tempo ey.
Fuera di esaki, el a agrega, cu ta bay bin mas espacio pa parkeer den centro di ciudad y na mesun momento el a anuncia cu tur e luganan di para auto, vaknan, cu ta geel y cu normalmente no mag di para aden si no ta paga pa e permiso, ta bay bira blanco. “Esey tambe lo trece un alivio grandi pa nos comunidad,” el a remarca.
Ariba nan pagina di Facebook oficial Aruparking tambe a publica un video den cual nan a indica cu en berdad entrante awe 2 di mei Aruparking ta bay ta activo atrobe. E concepto, segun e video ta señala, ta cu mester paga dos florin pa por para na cualkier di e luganan di para auto. E dos florin por wordo paga cash na e mashinnan of por paga esaki via pay.aw tambe.
Pa loke ta e mashinnan di Aruparking, den luna di maart tambe Bon Dia Aruba a dirigi algun pregunta na Minister Arends tocante Aruparking y a puntra ariba e mashinnan cu no ta trahando. E momento ey Minister Arends a contesta, “Aruparking ta den proceso pa pone tur mashin operacional back.”
A puntr’e tambe si debi cu ta bay bin un maneho nobo, tambe ta bay tin mashinnan nobo of ta bay drecha esnan cu ta daña. “Ta bay tin mashinnan funcionando na tur zona di parkeer, sea nobo of esnan existente,” minister Arends a expresa.
