(AP) – Awaseronan constante a obliga e interupcion di e buskeda di 30 persona ayera diaranson. Ta parce cu nan a keda pega pa tera cu a los den un mina di oro no autorisa y a mata por lo menos 23 persona na isla Sulawesi di Indonesia e fin di siman ultimo.

Mas di 100 persona tabata buscando oro diadomingo ultimo na e mina artesanal chikito ubica na provincial di Gorontalo, ora varios ton di tera a cay riba e tentnan di campamento improvisa.

E labornan di buskeda a keda suspendi ayera atardi debi na awaseronan fuerte, segun loke Heriyanto, ken ta encarga di e Oficina provisional di Buskeda y Rescate a bisa. E personanan rescatista te ainda no por a haya e desaparecidonan segun loke el a conta.

Agencia Nacional di Buskeda y Rescate ayera a bisa cu 92 bisiña a logra scapa di e suceso ora e teranan a los. E rescatistanan a logra saca varios hende cu bida, 18 di nan herida. A recupera 23 curpa, entre nan un mucha di 4 aña, mientras cu 30 persona a permanece desaparecido.

Mas di 1,000 funcionario, incluyendo soldaatnan, tabata participa den e operacion, segun Edy Prakoso, director di operacion di e agencia a menciona.

Forsa Aereo di Indonesia a indica cu nan ta bay manda un helicopter pa agilisa e buskeda, cu a bira complica debi na awaseronan y tera instabil.

Imagennan publica pa agencia di rescate tabata mustra un chubato kitando basta tera y piedranan cu tabata blokia e acceso na e luga.

Mineria informal ta habitual na Indonesia y ta proporciona un medio di bida instabil pa miles di persona cu ta traha den condicionnan halto di riesgo y unda por haya malesanan of e mesun morto.

Teranan cu ta los, inundacionnan y caida di brugnan ta apenas algun di e riesgonan cu mineronan ta enfrenta. Un bon parti di e procesamento di oro ta implica mercurio y cianuro, substancianan hopi toxico y trahadonan cu ta usa tiki of nada di proteccion.

E ultimo accidente minero a sucede na April 2022, ora 12 hende muhe cu tabata busca oro den un mina ilegal a keda pega pa teranan cu a los den e districto Mandailing Natal panort di Sumatra. For di algun añanan atras activistanan medio Ambiental ta haci campaña na tur e pais, specialmente na Sulawesi, na unda e practica a aumenta. Loke a sucede diadomingo ultimo a renoba nan peticion.

“Gobierno local, cu a permiti pa e actividad di mineria ilegal di oro continua den e zona aki, a contribui na un desaster mortal,” Muhammad Jamil, ken ta lider di e division legal di e Red di Activismo di Mineria, un grupo di supervision Ambiental a señala.

Hopi hende ta comparti e responsabilidad pa mineria di oro ilegal, for di esnan cu ta traha riba tereno hasta funcionarionan di gobiernonan local y polis.