Awasero torencial a yena mayoria di dam completamente

Inespera un awasero torencial a asota Aruba diadomingo marduga pa mainta. Esaki ta un awasero cu ta di un duracion di mas largo mes cu manera a wordo spera di Horcan Mathew. Tabata manera un sorpresa cu ta lanta mainta cu asina un cantidad di awa cu a yobe den mayoria districto di Aruba. Kisas pa un cu no hopi molester y pa otronan sigur un desilusion formal mirando nan pertenencianan bay perdi cu un hogar bou di awa. Sigur ningun hende no kier pasa un den amargura asina ki cu cantidad di awa cu a drenta for di dilanti y sali bek patras.

Tabata diadomingo mainta net despues di e torencial awasero aki di biaha esunnan encarga cu Departamento di Agricultura, Cria y Pesca Santa Rosa a percura pa haci un inspeccion na e damnan cu mas ta den cercania di cas. Sabiendo tambe cu tin algun dam cu no tabata falta mucho pa yena ful. Esaki sigur ta percura pa tin un miho bista y tambe registra tur e damnan cu a yena ful of otronan cu a bay “over”. Nos ta papiando aki di damnan cu ta keda mas parti den  Santa Cruz.

Cuminsando na e dam di Cas ariba, Dam di Rooibosal patras di Stadion di Nadi Croes y Crismo Angel, Dam di Sabina cu ta keda bandi Veld di Trappers, Dam di Desha cu ta keda patras di Kenro Jewlers, Dam di Pal’I Boonchi patras di Wen Kee, Dam di Piedraplat, Dam di Cheta na Paradera, Tanki Leedert y Tankiflip cu ta esunnan cu e yena completamente. Esunnan cu a bay over ta esun di Sabana Grandi., Rooi afo y Noord pariba di Misa di Noord. Tur e damnan aki tin awa te na rand y sigur mester pone atencion riba esaki. E damnan aki ta hopi hundo mes.

 Na momento cu un dam tin asina hopi awa acumula sigur esaki ta bira un peliger pa mucha. Nos sa cu muchanan ta hopi prufia  y sigur lo kier bay hunga of tin te hasta ta baña den e dam. Nos di Departamento di Agricultura, Cria y Pesca ta haci un apelacion na tur esunnan cu ta biba den cercania di un dam pa pone bon adicion of avisa e muchanan kico porta e peliger y consecuencia di esaki. Sigur cu e tera tambe ta satura di awa y no directamente bo mester bay hunga den e dam of kisas bo para na rand mes esaki por sak y bo por cay aden.

Nos por a tuma nota tambe cu hopi ta e sushinan cu a bin via di rooi e termina den e dam cu por a observa hopi boter di plastic y otro obhetonan cu no mester ta den e dam. P’esey tambe nos ta haci un apelacion pa no tira sushi ni den e dam y mucho menos tampoco den e rooinan paso na momento cu tin un awasero torencial esaki ta bin cu tur sushi cu ta termina den e damnan rond Aruba. Esaki tampoco nos no ta desea. Di parti di Santa Rosa nos ta sigui cu nos servicio di entrega di awa awor  cu nos tin suficiente awa pa un periodo mas largo ainda pa nos productornan local por sigui produci cumindanan fresco.