(CaribischNetwerk) – Ta temporada di awasero na e islanan den Caribe. E ultimo siman por a nota mas awa cu normal a yobe. Casi tur dia cayanan ta bashi, y na Bonaire, hasta scol y crèche mester a cera.
Esey a sucede na momento cu den un solo anochi a cay 100milimeter di awa. Pa compara, KNMI ta considera un caida di 50 milimeter di awa como “un dia cu yobida pisa”. Gran parti di e isla a bira inaccesible, y hospital tabata habri solamente pa situacionnan di emergencia.
Cada aña e temporada di yobida ta genera problema na e isla, pa motibo di caminda malo y e mantencion atrasa di e rioolering. Bonerianonan ta keha cu gobierno no ta haci suficiente. “Cada biaha cera cayanan no ta un solucion, toch?” ta un reaccion cu ta scucha hopi. Algun persona ta haya cu Hulanda tambe ta responsable.
Keha cerca gobierno no tin mucho sentido. E comentario di gobernador interino, Nolly Oleana cu nan ta “bezig pa mira pakico na algun lugar tin asina hopi awa para” a genera mas indignacion entre habitantenan Boneriano riba rednan social.
Riba e otro islanan no tin hopi diferencia. Tambe na Corsou tin barionan ta hundi bao awa. Y hasta na Aruba, e isla mas sur den Caribe, conoci como un isla desierto. E motibonan ya ta conoci pa hopi tempo: A construi asina hopi cu e awa di yobida no tin unda pa bay. Tambe hende ta construi den areanan di fluho natural.
Potret di Marit Severijnse pa Caribisch Netwerk.
