Durante weekend Aruba a haya yobidanan fuerte cu a laga, un biaha mas, cantidad di caya y area bao awa, causando hopi molester pa gruponan grandi den comunidad.
Usuarionan riba rednan social a comparti imagen y nan malcontento pa cu e situacion. Areanan manera Palm Beach y Bubali tabata entre esnan mas afecta, unda cayanan completo a bira inaccesible pa trafico pa motibo di inundacion pisa.
Segun usuario W.I. a indica riba Facebook, na Palm Beach “hopi cas a keda memey di plas di awa.” Tambe usuarionan a critica cu a bin trabaonan na Bubali y Palm Beach, y ta net e dos area aki a sufri e pio consecuencianan di e awasero, lagando e residentenan den e areanan aki babuca.
Shaba y Tanki Flip tambe a registra inundacion severo, causando cu e areanan aki tabatin partinan completamente inaccesible pa trafico.
Maske autoridadnan di Aruba ta na altura di e situacion incomodo y inaceptable aki, toch no ta mira un solucion. E mantencion di e gulidonan y drainnan ta laga hopi di desea, loke ta conduci cu cada biaha ta keda confronta e problemanan aki, cu ademas di causa molester, ta afecta economia di Aruba, strobando negoshinan y creando mal impresion cerca nos valioso turistanan.
Ademas di mantencion, tambe mester aborda e tema di inversion den un infrastructura cu lo por maneha e situacion di awasero, principalmente si tene cuenta cu adaptacion pa cu clima.
