Yobidanan fuerte ayera a basha riba costa oriental di Australia, suta pa candela y secura, treciendo un tiki inundacion den Sydney y alivio pa e bomberonan cu ainda ta luchando cu decenas di punto di candela na New South Wales.
New South Wales ta e estado cu a keda mas afecta pa candela forestal cu a mata 33 persona y destrui 3.000 cas, den un temporada di candela sin precedente cu a cuminsa na 2019.
E comisario di servicio di bombero rural di e estado, Shane Fitzsimmons a bisa cu e tabata optimista cu e awasero lo yuda pa paga algun candela durante proximo dia. El a bisa cu ainda tin 42 punto di candela den e estado cu 17 di nan fuera di control.
“Awasero ta bon pa negoshi y matanan, como tambe e ta bon pa paga algun candela cu nos ta tratando pa varios luna. Nos no kier mas daño y interupcion generalisa pa inundacion, pero sin duda, e ta bon bini pa e clima seco”, el a bisa.
Bombero no por contene e candela grandi sin e yudansa di e awasero. Ta pronostica cu e yobida lo move sur occidente for di e costa nort oriente durante proximo siman, treciendo e prome muhamento substancial cu lo alcansa decena di punto di candela cu a extende durante simannan.
Advertencia di fuerte yobida y inundacion ta extende na gran parti di costa di New South Wales. Autoridad a rescata 6 persona cu a keda afecta pa inundacion diaranson.
