Diabierna anochi durante rueda di prensa minister presidente Evelyn Wever-Croes a elabora riba e casonan di coronavirus/Covid-19, y tambe referi en corto na e accion militar di Merca pa combati trafico di droga den nos region.
E mandatario a indica cu esaki lo yuda combati e virus di droga dilanti costa di e pais bisiña Venezuela. El a splica cu e presencia di militarnan Mericano den area di Caribe ta debi cu “Merca a dicidi di aumenta y intensiva su control pa purba di combati traficacion di droga.” E ta haya cu e accion aki ta yuda nos pa tene nos awanan mas sigur.
El a declara cu gobierno di Aruba a tuma nota cu Merca a dicidi di intensiva control pa loke ta transporte di droga den nos region. “Nos ta satisfecho cu e posicion aki cu ta yuda nos tambe den combati ilegalidad. Combati traficacion di droga y combati tambe transporte ilegal di persona,” el a declara. Premier Wever-Croes ta haya cu e accion militar di Merca lo yuda nos tambe den contene con lihe e virus akinan lo plama.
Apart cu Merca a anuncia ta intensiva su presencia den area di Caribe, Aruba ta bay intensiva control di su fronteranan y nos control ta extra activo y alerta den e dianan aki, segun prome minister. E mandatario a bisa cu nos frontera ta cera y ta reforsa actualmente. Mientras Coast Guard lo sigui controla nos awanan teritorial, y tambe polis na nos costa ta fortifica caba.
Ademas si mester di Marina Real, gobierno lo pidi asistencia di Hulanda pa esaki, el a bisa. Ya caba tin conversacion riba e tereno aki cu Hulanda. Di e forma aki e prome mandatario a purba di trece un tiki calma den nos comunidad, specialmente pa e ansia cu e noticia aki por a ocasiona.
