Aña 2015 tabata un aña basta seco y esey a contribui cu no tabata tin mucho cria di sangura rond di nos isla. Pero nos no mester descarta cu tin otro maneranan pa e sanguranan conoci como Aedis Aegypti broei, manera plasnan cu tin basta tempo para, principalmente di dumpnan ilegal, scoternan caminda ta pone pochi di mata y tambe hemchinan cu ta gara awa di airco, pa nos menciona algun.
Esey, segun GKMB mester combati esakinan, pasobra aunke cu e index ta mustra cu e transmision di Dengue cu Chikungunya tabata relativamente abao, sinembargo tin cu tene cuenta cu cualkier un manera cu e sangura haya un luga pa broei, e ta haci’e, cu e consecuencianan cu nos ya tur conoce.
Hopi control
2015 a cera manera tur aña manera ta conoci pa GKMB cu hopi accion, hopi control den bario, control na hotel, control na casnan di anciano. E trabaonan ta bayendo. Tin hopi cos cu ta pasando simultaneamente, segun funcionario di GKMB, Clayton Croes. Mester compronde cu GKMB tin 13 tarea defini y pa loke ta 2015, a logra haci esakinan y na e manera cu GKMB sa con pa haci’e.
GKMB a cuminsa ripara, haciendo analisis di datonan cu ta drenta, hopi cria cu a wordo haya positivo, esta cu tin cria di sangura Aedis Aegypti, nan ta hopi cria cu por bisa cu ta traha door di hende mes. Tur hende ta spaar placa di tal manera colecta awa. Pero tin cu haci’e na un manera sano y responsabel. Hopi biaha ta pensa cu no ta haciendo nada malo, pero tin cu haci esaki na manera adecua. Una bes cu ta cuminsa colecta awa na un manera iresponsabel, ta cria un ambiente perfecto unda cu e sangura por broei y multiplica hopi lihe. E ora inmediatamente tin molester di sangura rond di cas.
E procesonan
GKMB tin diferente proceso na unda ora cu topa cu casonan asina. Loke ta sosode inmediatamente, ora cu haya un cria activo, ta splica e doño di cas kico el a haya, kico e mester haci pa preveni esaki y na mesun momento ta dun’e un advertencia. E advertencia ta djis un sistema pa GKMB tene un record di e adres, con ta bayendo, si e hendenan a causa molester den pasado y ta duna e posibilidad cu den futuro por duna un multa si mester yega asina leu.
Tin bario mas activo cu otro of ta full Aruba GKMB a mira cu tin casonan di cria pa cual aki Croes ta splica mas di e problemanan cu tin awor aki.
Tin bario cu ta keda frecuenta cu cria. Barionan cu tin cas mas cerca di otro, compara cu tin bario cu casnan mas leu di otro. Por ripara cu tin mas cria of menos cria, pero ta debi na e cantidad di casnan cu tin den e region. Mescos cu casonan sospechoso pa controla y trata, tambe ta parti rond di e isla. No por bisa cu in cierto bario cu tin mas cria cu otro.
Casonan rond Aruba
Por bisa cu henter Aruba tin aki aya. A haya un lista siman pasa di e casonan sospechoso di loke ta Dengue y Chikungunya, tur esakinan ta plama riba e isla. no por bisa ainda, mirando datonan di e aña aki te cu awo, cu tin cierto barionan cu tin mas caso sospechoso cu otro, pero si por refleha riba 2015, mirando e Estadisticanan di e departamento di epidemiologia unda cu tin mas caso sospechoso compara cu otro.
Endemia
Nos por wordo contagia cu Dengue y Chikungunya cu ta birando endemico na Aruba, no por duna na e turistanan y no ta nechi pa e imagen di Aruba y kier preveni esaki cu e proyecto aki. Por bisa cu a cera 2015 cu un total di 1623 caso sospechoso, caminda cu tin cu compronde cu ta Dengue, Chikungunya y Zika tambe. Na fin di 2015 a haya tres caso sospechoso di Zika. Esakinan a pasa testnan di laboratorio, manera custuma, y tur tabata negativo. Ta contento cu e dokternan a yega asina leu di reconoce e diferente tareanan cu departamento di salud publico a manda pa splica riba e diferente sintomanan di Zika y cu ta tumando esaki den consideracion pa asina cuminsa traha e casonan sospechoso cu ta drentando.
Dumpnan ilegal ta keda un problema
Dumpnan ilegal ta keda un problema pa GKMB, mirando cu sushi cu ta keda acumula ta un luga sigur pa crianan wordo forma, causando un dolor di cabes pa GKMB.
Segun Croes, den pasado y te ainda den 2015 ta sigui haya e problema di dumpnan ilegal. Hopi hende no ta haci bon uzo di e posibilidadnan cu tin pa deshaci corectamente di nan sushi.
Awendia ta haya tambe cu e sangura Aedis Aegypti, cu ta riba nos isla pa centenares di aña, a cuminsa adapta su mes. No ta asina cu ta bisa pa tene cuenta cu awa limpi. Por ultimo, Croes a comenta cu ta hayando hopi biaha cu ta haya e sanguranan aki den awa sushi, manera plasnan cu ta keda para hopi tempo, posnan di awa cu ta traha via sistema di septic tank, ora cu laga posnan habri, caminda cu ta crea un cria grandi, unda cu e sangura a siña evoluciona y prefera den e awanan sushi, causando un molester tambe riba nos isla.
 (1).jpg "Swipe actie lo dura 2 luna, lo fumiga tur bario rond Aruba")
