E demostracion cu a tuma lugar na hospital ayera mainta por parce un sorpresa, pero tabata algo cu por a anticipa. Pa basta tempo caba tin malcontento riba varios tereno cu ta cuminsa sali na superficie awor.

Asina tabatin e problema di e salida di e director financiero, cu tabata e figura central na banda di hospital den negociacion di un CAO nobo. Tabatin e asunto di e holor malo cu tambe a afecta tanto pacient como empleadonan. Recientemente e conflicto cu e specialista di oncologia cu finalmente no a keda. Ta yega un dia cu e emocionnan ta bay halto y lo tin un grupo cu ta bisa “te aki y no mas”. Ta parce cu e dia ey a yega. No ta pa tuma parti den e conflictonan ey; sin embargo, hasta si resolve esakinan, nan ta contribui na un ambiente di deterioro den e institucion, cu ta rekeri medida urgente pa cambia e rumbo negativo aki.

Den un situacion asina, esnan yama pa tuma decision pa mehora e situacion, no mester vacila pa tuma rienda di e asunto, no pa cuminsa un ofensiva contra e supuesto contrincantenan, sino pa cuminsa drecha loke ta daña. Y pa haci esey mester cuminsa cu analisa y reconoce loke no ta bon. Y den esey e puntonan di contacto cu publico ta hopi importante, pasobra aki ta unda iritacion por pasa na mas cu esey, loke nos no ta desea y no mester sucede tampoco. Concretamente e problemanan na Spoedeisende Hulp no ta data di ultimo tempo y tin hasta raiz profundo cu ta hiba nos na otro areanan di cuido medico. Un ehemplo.

Manera preseidente di e sindicato di personal medico a trece dilanti, un gran parti di e personanan cu ta acudi na e unidad di emergencia, no mester yega ey mes. Esey ta, si tin otro alternativa factible unda nan por bay… Y ta aki e problema ta origina, den e prome linea di cuido unda tin problema cu no ta haya solucion y por lo tanto ta ‘end up’ na hospital. Manera nos ta mira esaki, e problema ta cuminsa cu e cuido primario den man di docter di cas no por sirbi como punto di atencion satisfactorio. Esaki no pasobra e mediconan aki no ta bon den loke nan mester haci, pero pa e manera con e cuido ta organisa. Continuamente nos ta tende di hopi pacient cu ta costa nan varios dia pa haya un cita cu nan docter di cas. Si mientras tanto nan estado di salud empeora, nan no por acudi, den mayoria di caso, na e docter di cas, cu ta cubri solamente parti di dia. E temponan cu mediconan di cas tabata disponible casi 24/7 ta pertenece na pasado, y pa bon motibo. Nan tambe mester por tin un bida normal.

Sin embargo, mayoria di hende nan estado di salud ta empeora den oranan di atardi y anochi, y si nan no a logra bay nan docter di cas, nan ta termina na hospital, unda den hopi caso nan no mester ta. A crea e huisartsenpost pa atende esaki, pero toch e mayoria ta keda acudi na e unidad di emergencia. Te awe en todo caso e intentonan pa educa y informa hende no a duna resultado. Motibo pa laga esey asina? Nos no ta kere. Mester por contempla otro solucion pa e prome linea di cuido, cu ta haci cu e casonan den oranan di atardi y anochi/marduga no necesariamente mester bay hospital, pasobra esey ta e unico facilidad cu tin. Lo por ta un posibilidad pa crea un cantidad (limita) di centro di docter di cas, cu ta opera cu un orario mas amplio y cu ta reparti riba e isla di tal forma, cu e pacient cu un problema ta acudi na un centro asina prome? E ora na e centro ey por tuma e decision, despues di un prome diagnostico, si ta necesario pa referi e persona na hospital mes pa tratamento.

Riba esaki ta bin e problema actual di falta di personal, cu tampoco ta algo facil pa soluciona. Hulanda ainda ta keda nos pais di suministro preferi, mientras cu na e pais ey mes tin un escasez creciente di personal medico en general. Cierto di nos por keda insisti cu nan kier duna preferencia na personal medico di Hulanda, pero ta realistico pa pensa cu den e proximo decada lo bin un cambio drastico den e actual escasez? Riba esey nos tin naturalmente e discusion tocante nos studiantenan di medicina den region cu lo por ta e alternativa, pero nos lo mester dicidi di termina e discusion y establece e criterionan di calidad cu mester conta pa tur. Tin hopi mas profesion unda nos por mira e desaroyo den direccion di profesional di diferente parti di mundo, loke no ta nada straño pasobra esaki tambe ta parti di globalisacion, textualmente.

Asina nos por mira cu, ora kier mehora cuido medico, e parti mas facil ta pa traha edificio nobo. Percura pa mehoracion di operacion di henter e aparato ta resulta hopi mas dificil. Atende e asuntonan cu diligencia, sin perde tempo cu ‘blame game’ ta parce nos e rumbo indica.

LJMADURO – 26-MAR-2019