E listanan di e partidonan mas grandi den ultimo eleccion, esta AVP y MEP, ta mustra cambionan den nan escogencia di candidatonan. Baluartenan den e partidonan aki manera Ady Thijsen y Rene Herdé, ambos lider di fraccion den pasado, por ehempel a baha basta den posicion. Motibo: ambos partido a traha espacio pa hende nobo y siguramente mas jong.

Bon Dia Aruba a entrevista sr. Thijsen y sr. Herdé diabierna pasa riba e dia di entregamento di lista pa eleccion 2017. Sr Thijsen ta number 13 awor mientrastanto na 2013 su posicion tabata number 5. Sr. Herdé tabata riba posicion 16 na 2013 y awor riba posicion 27.

Nos a puntra sr. Thijsen pa su comentario. “Ami ta esun cu mas aña den parlamento. Na 2005 mi tabata lider di fraccion, mi tin hopi experiencia. Nos organisacion ta hobenese. Nos ta busca mas hende pa drenta e organisacion mas fuerte cu nunca. Specialmente den momentonan dificil aki nos mester gana eleccion pa haci cambionan.”

Nos a puntra kico e ta pensa awor cu tin un chens grandi cu e no drenta den parlamento mas, como cu na 2013 MEP a haya 7 asiento. Sr. Thijsen: “No ta nada, mi ta cobra mi pensioen caba. Ma haci 12 aña e trabou caba. E partido mester di mi den e parti ehecutivo. Pa motibo di tur mi experiencia nan por uza mi pa un ministerschap. Mi no tin niun problema, ami kier coopera y hunto cu e organisacion tuma decisionnan na bienestar di pueblo. E politica no ta pa bo. Bo mester duna bo parti. Ami ta contento pa mi por yuda pa yega na solucionnan. Pasobra e meta final ta pa nos trece un cambio den e pais ki pa un miho porvenir. Un hende su so no por haci e cambio.”

Segun e politico, lider di MEP Evelyn Wever-Croes a papia cun’e y no tin friccion. “Mi ta bon cu e lider, nos a traha 8 aña hunto caba. Y e tin tur confiansa den mi p’esey el a papia cu mi riba esaki. E sa cu e por papia cu mi y mi ta coopera cu mi posicion. Un team nos ta y nos ta convenci cu nos ta bay gana. E unico manera mi lo cay afo ta si MEP no ta gana y ta bay bek den oposicion. Pero ma duna mi parti pa 12 aña largo y mi ta sigui cu mi carera como abogado.”

Espacio pa hubentud den AVP

Nos a puntra sr. Herdé kico ta e motibo tras di e cambionan den e lista di AVP aworaki. “E ta parti di e renobacion di e partido. Bo tin cu traha luga riba lista pa hende nobo. Unico modo pa bo renoba ta pa duna hubentud espacio y hende cu experencia poco poco bay for di e partido. Esaki ta exacto cu ta tumando luga den partido.”

Nos a puntra den e contexto ey dicon e ora e prome 4 posicion no a cambia. “Pasobra bo mester un lista balansa pero no solamente riba 1 te 5 pero tambe patras manera ami mes. E echo cu mi ta riba 27 no ta nifica cu mi no tin trabao di haci. Mi tin masha hopi trabou y bo ta pone bo experiencia na dispuesto pa partido y pueblo.”

Nos a puntra e ora si no tin niun mal sentimento cerca dje. “Absolutamente no. E prome 15 aña mi tabata miembro, mi tabata traha pa AVP pero no riba lista. Ma traha 8 aña aworaki orguyosamente directamente den parlamento, cu ministernan. Awor mi ta bay den un fase nobo, 15 aña mas pa e partido di pueblo. Al contrario mi ta sinti mi honra cu ainda nan ta pidi mi pa sigui traha, esey ta nifica cu ainda nan ta aprecia mi presencia.”