Nan ta acusa e gobierno formando caba di maldad
Guera politico no conoce tregua, y ta exactamente esey nos ta tende di e lider di e partido cu a gana, pero a final de cuentas a sali perdi. Manera un hende cu a haya un flat tire anto no tin spare. El a yega cas, sin tire, riba e rim, pero el a yega cas… anto asina mes, e kier sali bay core mesora atrobe. A pesar cu e ultimo fin di siman aki nos a haya e leve impresion cu el a cuminsa ‘perde, haya’ nos ta kere cu e ta masha bon na su tino, y conociendo su partido pa planifica tur cos bon, tur loke nos ta mira awor ta net esey, bon planifica. Tur e payasada di bisa prome cu e ta retira, despues yama tur hende bin duna apoyo (y cuanto di nan por fin a aparece?), pa despues e baha cabes pa e realidad di loke gobernador probablemente a bis’e.
Tur otro biaha el a viola e regla di oro cu loke ta papia cu gobernador, ta keda den e camber ey, pero e biaha aki si e no a bisa kico gobernador a bisa. Nos ta supone cu e combersacion a bay bon, den e sentido cu si acaso e tabata pensa di sigui goberna, gobernador lo a pone cambia di idea. Pasobra sin cu gobernador a papia ainda cu e demas partidonan, el a sali pafo cu e mensahe cu e no tin nada di busca den formacion di gobierno.
Pero no a caba ey. El a bira e atake riba e contrincantenan politico atrobe, declarando cu ta tur sorto di maldad e gobierno nobo ta bay haci. Nan ta bay comete persecucion politico, loke e nunca a haci. Laga nos djis refresca su memoria cu un solo caso, pasobra tin mas: director, director interino y Ontvanger di Servicio di Impuesto. No ta nan mester a bay di Belastingdienst, ganando despues nan caso dilanti hues, pa nos termina awor cu un departamento caotico bao dirigencia di hende a yega na partido, pero inepto, cu no por ni drecha e caos di paga number di auto tur aña? Ta na e gobierno nobo e tarea, entre otro, pa bay drecha loke a daña eyden, pa no papia mes di tur e departamentonan cu ta maneha proceso di permiso, unda ta un limpieza grandi mester bay tuma luga, pa garantisa cu no tin corupcion mas y e cliente ta ser atendi manera debe ser.
Pero bon mira, bo mester tin basta curashi pa a dirigi e gobierno mas delincuente den historia di Aruba y Reino, anto bo ta preocupa cu e siguiente gobierno, cu no a ni forma ainda, lo bay haci cos malo! Di berdad e persona aki no ta comprende cu ta miho e bay reflexiona tocante su papel den duna oportunidad, consciente o inconsciente, na e miho mashin di criminalidad hamas instala den gobernacion, bao guia di varios ministro. Ni si e mes no a participa den tur esaki, tanten no tin prueba nos no ta papia di esey, pero e ta keda responsabel pa loke a pasa. Y mas ainda, pasobra e mes a bay bisa oficialmente cu e tabata na altura di e maldad nan pero no a actua. Es mas, nos mester tende su persona expresa e palabra corupcion ainda, y ademas nos mester tende e prome palabra ainda di drecha cos cu no ta bon, en todo caso den e proceso di permiso di residencia, cu ta relaciona tambe cu e conseho riba situacion di mercado laboral. Awor e no mester drecha nada mas, e tarea ey a keda pa e siguiente gobierno. Nos lo ta vigilando e proceso ey tambe, pasobra no ta cuestion di critica e gobierno saliente y ignora si acaso e gobierno nobo no drecha nada.
Pero en todo caso e actual prome ministro ta e persona na Aruba cu menos autoridad moral pa critica otro riba comete maldad den gobierno. Si e ta experto den bon gobernacion, anto pakico e no ni menciona e palabra ey den ocho aña. Anto awor e mes ta bay dicta catedra den bon gobernacion? Por ta cu nan por duna su persona un cupo na Universidad di Aruba, pa e bay siña e studiantenan con bo no mester goberna, pasobra esey ta su experticio.
Nos prome ministro no ta comprende cu si nan mester a sigui den gobierno, si el a haya un partido asina loco pa bay goberna cu ne, hamas lo por drecha algo, pasobra esun cu a organisa crimen durante tur e añanan ey, lo ta esun cu mester bay drecha e luga, por fabor.
Di otro banda, y pa bolbe na e forma di atake constante cu e partido aki ta practica, nos ta kere cu e otro partidonan mester tuma esaki cu calma, y considera cu e atakenan constante tin un bentaha grandi: nan ta tene bo skerpi. Percura goberna cu seriedad y transparencia, y uza e atacado como benchmark pa loke bo ta haci. Manera Johan Cruyff tabata bisa: ‘tur desbentaha tin su bentaha’. E guera sin tregua di Mike Eman tin su bentaha.
