Manera conoci diabierna pasa Aruba a yega na un acuerdo den concepto cu Venezuela pa asina yega na un solucion pa e boycott di e pais Latinoamericano. E contenido exacto di e documento aki no ta conoci.
Awor miembro di fraccion di oposicion AVP, esta Richard Arends, kier pa prome minister Evelyn Wever-Croes bin parlamento pa contesta preguntanan riba e documento sea acuerdo aki. E kier pa e prome minister ta informa parlamento riba e reunion di diabierna pasa cu Venezuela y tambe representantenan di Hulanda y Corsou.
“E peticion aki ta meramente pa parlamento den su totalidad haya claridad riba e reunionnan y negociacionnan cu lo ta tumando luga cu representantenan di gobierno di Venezuela pa sali di e impasse cu nos pais bisiña,” sr. Arends ta splica.
E parlamentario a remarca den un relato cu e informacion cu e la a ricibi te awor ta via medionan di prensa, como tambe for di coleganan di parlamento cu a sostene reunionnan cu e mandatario riba nivel di partido. “Den su tarea pa controla gobierno, esaki obviamente no ta e canal apropia pa ricibi dato ni tampoco informacion. Ni Presidente di parlamento a ricibi informacion oficial como representante di e organo di cual nos ta forma parti di dje.”
E blokeo comercial imponi pa Gobierno di Venezuela, como tambe e impedimento di movemento liber di nacionalnan Hulandes pa Aruba ya ta durando 10 dia. Aunke cu relacionnan comercial, specialmente importacion di productonan for di Venezuela, a disminui durante e ultimo añanan e efecto di e blokeo unilateral aki ta visibel, asina sr. Arends ta motiva su decision pa pidi e premier di Aruba pa bin duna un splicacion na parlamento riba e asunto.
Te awor e fronteranan cu Venezuela ta cera. Na Corsou ta mira caba e efectonan den tiendanan y tambe na Aruba tin mas scarsedad di cierto fruta y berdura. Ainda gobierno di Aruba no a informa con leu nan ta cu e proceso di analisa e ‘acuerdo’ y haya aprobacion. Cada representante, pues tambe esun di Venezuela, mester a bay bek nan pais pa asina haya un aprobacion final riba e acuerdo.
