AVP ta nenga di traha cu MEP: Boluntad di e partido posiciona riba boluntad di pueblo

Comienso di e siman aki, e partidonan cu a logra saca asiento den ultimo eleccion – AVP, MEP, Futuro y PPA – a reuni cu informador Tisa LaSorte pa evalua e posibilidadnan di forma un coalicion. Algo cu a hala hopi atencion tabata e declaracionnan di lider di AVP, Mike Eman, kende rotundamente a descarta e posibilidad di forma un coalicion cu MEP.

Di su banda, lider di MEP, Evelyn Wever-Croes a indica di ta dispuesto pa traha cu cualkier di e partidonan cu a saca asiento den eleccion. Lider di Futuro, Gerlien Croes a indica cu lo haci un escogencia basa riba e plan di partido di cada partido.

Eman a bisa cu no ta dispuesto pa traha cu MEP pasobra e direccion den cual MEP kier hiba Aruba ta completamente diferente na e vision di AVP. Sinembargo, algo interesante ta e hecho cu tanto MEP como AVP a bisa cu den nan plan di partido tin hopi en comun cu partido Futuro. E pregunta ta surgi e ora, ki tanto diferencia por tin entre MEP y AVP?

No solamente esey. Boluntad di pueblo, segun expresa den resultadonan di eleccion, ta mustra mas cla cu nunca cu e mayoria di votador na Aruba ta dividi casi mita y mita entre MEP y AVP. Si nos traduci e resultadonan, esaki ta nifica cu mita di e mayoria di votador kier sigui e vision di MEP y e otro mita esun di AVP. E solucion e ora ta pa e dos partido aki sinta hunto representando cada un su votadornan, y purba di haya un punto medio di acuerdo.

Na momento cu AVP ta dicidi riba su mes cu definitivamente no ta bay sinta cu MEP, e ta privando e otro mita di e mayoria di votador, cu si kier hiba Aruba den e direccion cu MEP a propone, bisando nan practicamente cu nan voz y boluntad no ta importante. Y ningun politico por impone su boluntad riba e libertad di otro persona. Esaki ta principalmente peligroso na momento cu AVP a haya apenas 265 voto mas cu MEP segun resultadonan oficial di Conseho Electoral. Cu esaki por bisa cu mayoria di Aruba no a scoge pa AVP goberna, sino mayoria di Aruba a scoge pa AVP y MEP goberna hunto.

Cu partido AVP ta scoge pa no traha hunto cu partido MEP ta un muestra cu e partido ta pone su boluntad y su escogencia riba e boluntad democratico di pueblo di Aruba. Y esaki no ta prome biaha.

Por recorda na aña 2017 cu resultado di eleccion a duna partido AVP un victoria cu 23,376 voto, hopi mas cu e 17,872 ricibi na 2024. Asina mes, AVP a dicidi cu, ya cu no a logra un mayoria absoluto di 11 asiento pa goberna nan so, no tabata dispuesto pa forma gobierno cu ningun otro partido, lagando MEP (cu 22,061 voto) bay forma un gobierno. Y a pesar cu Eman tabata votegetter e eleccion ey, cu mas di 7mil voto, tampoco el a drenta Parlamento pa representa su votadornan cu a deposita nan confiansa den dje.

Bon Dia Aruba ta haci un yamado na tur politico eligi pa pueblo, pa recorda cu nan rol den nos democracia ta pa representa pueblo di Aruba, y no laga nan boluntad individual of di nan partido triunfa riba e boluntad di e votadornan.