Pa evita confrontacion y pa garantisa orden publico, partido AVP a dicidi cu ta miho pa cambia e localidad unda nan lo topa prome cu bay entrega lista y tambe e orario cu lo haci esaki. A lo menos esey ta locual cu lider di e partido y actual prome minister di Aruba Mike Eman a duna di conoce durante di un conferencia di prensa ayera tardi. E punto di salida nobo lo ta na veld di cricket y orario pa yega censo lo ta 3.30pm.
E intencion incialmente di e partido tabata pa sali for di ‘Green Square’ y pa entrega e lista pa 3or di atardi. Esaki tabata un di e cosnan cu a causa polemica ya cu e orario ey ta destina pa partido RAIZ segun e schema traha pa Conseho Supremo Electoral (CSE). Tambe a wordo comenta hopi di pueblo cu e localidad di Green Square como punto di salida lo bira un problema paso cu tin dos otro partido cu nan punto di salida ta den sercania.
Durante e discurso hiba pa sr. Eman den e conferencia di prensa, el a splica cu tabata tin diferente combersacion entre AVP y otro institutonan importante pa asina facilita e proceso di entregamento di lista. Sr. Eman ta splica cu e motibo pakico nan a scoge pa 3.30pm ta paso cu no tin otro partido programa pa e orario ey. El a duna di conoce cu maske nan tin tur respet pa e Conseho Electoral y nan intencion pa laga tur cos cana den bon marcha, niun caminda den ley ta mara un partido na un orario specifico; ley ta bisa solamente cu por entreg’e di tal ora pa tal ora riba e fecha stipula pa CSE.
Segun Eman, e ta spera cu awor por pone un fin na e capitulo aki y “flip e blachi” pa asina Aruba por gosa di un proceso democratico.
