AVP scuchando tur voz den bario: Pensionadonan ta sclama auxilio: Pobresa den barionan ta penoso

Sonia Westerburger ta un pensionado di 86 aña di edad. Riba un Diadomingo atardi e a habri porta di su humilde cas na Tarabana pa dirigentenan di AVP topa e bario. Sonia a invita su amistadnan den bario cu ta confrontando e mesun retonan. Costo di bida a bira impagabel y den bario esey ta tema cu mas ta domina e combersacionnan.

Na Bushiri tambe ciudadanonan a bini hunto riba un otro Diadomingo na cas di Wina Tromp. Wina Tromp ta un abuela di 56 aña cu ta cuida su tata di 85 anja cu retonan grandi di salud. Wina ta manera un mama tambe pa dos di su nietonan, Jeanmiguel di 12 aña y Jeanuar Loepstok di 14 aña.

Cu un dedicacion imenso Wina ta maneha e peso di e responsabilidadnan aki. E tambe ta comparti con caro bida a bira. Su nieto Jeanmiguel ta conta cu un stem tristo con school a mande cas cu un carta cu si no paga airco-geld di 150 florin di e anja escolar 2021/2022 e ora no por drenta anja escolar nobo. E famia mester laga di paga otro cos pa Jeanmiguel por bay school e aña escolar nobo.

Cada ciudadano di Bushiri cu tuma palabra tin pesonan y retonan similar. Un di nan ta Zulma Brito. Combersando cu Mike e ta comparti su odisea. Zulma ta perdiendo su bista. Casi e no ta mira mas. Hunto cu e retonan financiero e quebrante di salud aki ta un carga hopi pisa. Hobennan Jeanmiguel y Jeanuar ta papia manera hendenan grandi di deseo pa cambio cu hoben candidato Wendrick Cicilia. “Nos ta corda con Mike a pone cancha di yerba di futbol den bario di Bushiri”. Con weganan tabata wordo organisa cu Bo Bario. Nan hunto cu e ciudadanonan presente a bin pa laga nan voz resona, pasobra nan tin confianza cu cos por cambia bek y bira miho atrobe.

Riba un Diasabra mainta trempan tin un encuentro, e biaha aki cu ciudadanonan di Sabana Basora. Esaki ta tuma luga na cas di Jeadrienne Rosel di 28 aña, mama di 3 yiu. Jeadrienne ta conta con dificil e ta pa pone pan riba mesa pa e muchanan. Aki tambe tur luna ta purba paga lo principal y algun cuenta ta keda atras. Jeandrienne ta un mama balente cu no kier laga e muchanan sinti ningun momento con dificil e situacion relamente ta. Mike ta conta Jeadrienne con den tempo di su gobernacion a bini cu aumento di bijstand y a introduci schoolkindrenentoeslag hustamente pa mamanan cu un carga grandi asina. Esnan presente ta corda. “Pesey nos mester e cambio”, miembronan di famia Webb di Sabana Basora ta expresa den un coro cu hopi conviccion.

Solo ta bahando na Mamoticastraat 26 na Tarabana. Na final di e encuentro serca Sonia Westerburger e lider di AVP, Mike Eman, ta despidi di Sonia y gradicie pa su hospitalidad y curashi pa a pone su hogar disponible pa e dialogo importante aki. “Nos a scucha y nos ta cla pa trece cambio. Mike a inspira presentenan cu e vision pa un gobernacion basa riba e “Bon Comun”, ex sindicalista Clifford Heyliger ta recapitula na un otro encuentro di bario na Wabistraat cu ciudadanonan di Companashi.

Na porta Sonia ta pone su man cariñosamente riba Mike su schouder, “Mike, bo mes por a mira con dificil bida ta birando pa nos tur”. “Nos ta biba di man pa boca”, Sonia ta bisa cu un voz yen di duele. Bo ruman, Henny, hopi aña pasa a redobla nos pensioen y a habri e oportunidad pa nos a cumpra nos cas di pueblo for di FCCA. Hopi gradicido y orguyoso mi tabata ta. Pero mira mi cas awe, antes mi por a haci mantencion, pero awor ta algun cos nos por paga pa tene cabez riba awa. Bo tambe a yuda nos cu toeslag riba pensioen, pero awe ta sufri nos ta sufri na man di medida. “Pura, trece cambio pa nos Mike”, Sonia ta expresa cu e deseo y speransa di ainda mira miho dianan p’e y tur su amistadnan cu a presenta den su cura na Tarabana pa papia cu Mike y coleganan di AVP. Tur voz ta wordo scucha den bario, pa bay resona den un Plataforma nobo di cambio pa Aruba basa riba e principionan di Bon Comun. Esey ta e meta di e encuentronan aki pa creacion di un alternativa berde.