Ayera mainta lider di partido AVP, Mike Eman, hunto cu coleganan Mervin Wyatt-Ras y Clifford Heyliger a tene un conferencia di prensa dilanti di oficina di AZV pa expresa nan preocupacion pa loke ta e situacion cu remedinan cu no ta wordo cubri, mirando e ultimo informacion brinda pa e director di AZV indicando cu e organo tin un surplus di 50 miyon florin.

Eman, ken tambe tabata compaña pa algun pensionado como otro ciudadanonan, a remarca su preocupacion “pa e hecho cu Aruba ta bibando momentonan sumamente dificil” caminda cu un gran cantidad di ciudadonan di menos recurso y pensionadonan mester paga diferente remedinan cu ya no ta wordo cubri mas pa AZV.

“Den AZV y den Cocoloshi ta wordo bisa cu tin un surplus di 50 miyon florin. Nunca antes tabatin e pensamento cu AZV mester ta un instituto cu ta traha cu surplus camidna cu ta kita remdi, kita specialisacion di esnan cu mester di specialistanan, esnan cu mester acceso rapido na cuido medico cu ta wordo corta y remedinan mester wordo paga y na otro banda ta bisa cu tin un spaarpot di 50 miyon florin. Algo totalmente inacpetable, e ta haci nos pueblo hopi dolor, e ta causa hopi sufrimento, e ta causa hopi disgusto tambe den e comunidad aki,” el a señala.

Eman a menciona cu el combersa cu ciudadano- y boticarionan cu a dunele e lista di remedinan cu e ciudadanonan, cu no tin placa caba y cu ta bibando cu un deficit di 1300 florin pa luna, mester paga pe.

El a resalta cu ora un ciudadano mester remedi, e no por paga pe y e tin cu bay cas sin e remedi aki, “e ta un crimen contra e salud di nos hendenan,” el a bisa. “Nos a bisa caba sra. Evelyn Wever-Croes ta hortando e futuro di e pais aki y cu e medidanan aki e ta hortando e porvenir y salud di e pueblo aki, specialmente di esnan cu menos recurso,” el a agrega.

E lider di AVP a expresa cu e ta un “crimen” cu e Gabinete Wever-Croes a kita e placa di AZV unda antes tabatin un landsbijdrage pa yuda AZV y aworakiAZV ta haci ganashi y e ganashi ta bay wordo inverti mientras cu tin hende sufriendo den e comunidad pa motibo cu tin hopi remedi cu no ta wordo cubri mas.

“Wak e cifranan di cuanto hende ta fayeciendo na e momentonan aki, ken ta responsable pa esaki si bo tin 50 miyon florin surplus,” Eman a cuestiona.

Mimebro di partido y parlamentario Mervin Wyatt-Ras a enfatisa cu mientras gobierno “ta gaba cu tin un surplus, di otro banda e surplus aki ta un deficit den e cartera di e ciudadanonan. E gobierno aki a conduci na cu e salud di nos pueblo ta bay atras.”

El a expresa, for di su punto di bista, cu e gobierno no ta traha cu vision y cu nan “ta castiga e pueblo.”

“Tin un surplus y ta bay coy esaki spaar, mientras tanto hendenan ta bira malo y muri,” el a remarca.

Den nos edicion di diabierna 12 di april, relaciona na e mesun tema di AZV, nos a publica un articulo di e analista Simon Waslander, ken a señala cu pa 2035 AZV ta bay falliet.

El a indica cu den e relato financiero mas recien di AZV (2023), cu a wordo publica e siman pasa, tin un grafico cu AZV mes a traha cual, el a remarca a lague “den shock.”

Waslander a remarca cu e grafico ta uno simpel pero cu consecuencianan masha profundo mes y no ta hayando ningun atencion di nivel halto.

“Pa ta duidelijk e siguiente grafico ta mustra cu pa 2035, tur e reservanan di AZV lo a caba. Den otro palabra, AZV lo bay failliet pa 2035,” el a resalta.

El a menciona e rapport di Aruba Bird Life Foundation cu ta mustra cu aproximadamente 15,000 pa 20,000 hende extra lo mester bin Aruba pa traha den e sector di turismo pa si e cambernan extra lo bin. Den eskai el a indica cu no por lubida cu mayoria di e trahadornan lo ta di nivel di salario minimo of casi asina abou, pero nan lo haya derecho inmediato riba AZV y SVB.

“E fondonan ya caba ta un time bomb, si e scenario cu ABL Foundation ta pinta ta gasolin lo tira riba e candela,” el a enfatisa.

Waslander ta splica cu e calculacionnan probablemente di AZV ta asumi cu no lo bin niun recesion economico den e añanan binidero, pero el a cuestiona kico lo pasa si un recesion global of un ola grandi di inflacion afecta Aruba y full mundo. “E ora e proyeccion lo bira mas scur ainda,” el a subraya.

Mediante un comunicado di presna director di AZV, Edwin Jacobs, a contesta e articulo di Waslander sigurando cu no tin motibo pa crea duda den e posicion financiero di e fondo di AZV.

Banda di presenta e relato financiero 2023, AZV a presenta tambe e instrumento di maneho nobo cu a introduci oficialmente e aña aki pa reemplasa e recorte di 60 miyon florin den gastonan, esta su Cuadro Financiero Multi Anual (CFMA).

Jacobs a splica cu un parti esencial di e CFMA ta e modelo di proyeccion di gasto y entradanan cu a keda desaroya pa expertonan local; tanto di den AZV como pafor di AZV. El a resalta cu e modelo di proyeccion aki, AZV ta haya na su disposicion un instrumento valioso pa sigui maneha e fondo pa futuro.

Durante e conferencia di prensa AZV a presenta tambe e prome resultado di e modelo di proyeccion. Jacobs a splica cu den e grafico, e grafico cu Waslander a menciona, a mustra con e expectativa ta pa loke ta e desaroyo di tanto e resultado como e reserva di e fondo te aña 2040.

El a sigui splica cu e proyeccion aki ta indica cu despues di crea reserva e proximo añanan, memey di añanan 30, e reservanan lo agota, locual Waslander a señala, y lo depende atrobe di contribucion di gobierno.

“E proyeccionnan ta implica un tarea importante pa maneho di e fondo. Di un banda, gobierno lo mester sigui esforsa pa mehora e cumplimento cu e leynan cu ta percura pa entrada pa e fondo. Di otro banda, OE AZV mester keda esforsa su mes pa haci e sector di cuido medico mas eficiente pa asina contene (na un forma responsabel) e crecemento di e gastonan. Pues, a base di maneho, por pone cu e agotamento di e reservanan ta keda posponi te un momento mas laat den tempo,” Jacobs a remarca.

Tur esaki ta informacionnan preocupante cu di tur banda cu wak e, tin un efecto pisa ariba ciudadanonan di Aruba, cu den su gran mayoria ta depende di AZV pa por cubri nan necesidadnan medico.