AVP: Persecucion politico y maneho di “friends and family” ta sigui! Protesta di contratistanan chikito contra menasa y retiro for di DOW

Otro siman ta habri cu protesta di un otro grupo di trahado na un otro parti di nos isla. Awe tabata e grupo di trahadonan cu ta mantene limpiesa canto di caminda rond di nos isla. Por lo menos un di e trahadonan aki, sr. Fanchy Tromp di Santa Cruz, ya a haya retiro. Otro trahadonan a haya carta di advertencia cu lo bay kita nan di trabou.

Un di esunnan cu a haya carta di advertencia ta Papi Palm, cu ta traha canto di caminda for di aña 2001. Trahadonan y nan famia a haya sosten di partido AVP den nan protesta contra di e menasa y retironan door di gobierno di MEPORED. Ayera mainta tempran prome cu nan a bay traha, nan a reuni na cas di Papi Palm den Playa Pabou pa hunto expresa nan desaprobacion contra di e decisionnan cu e minister di DOW, Otmar Oduber y gobierno di MEPORED a tuma. Den bos di e homber y muhenan aki por a sinti e dolor, e preocupacion y hasta e rabia cu nan tin pa motibo di e situacion cu gobierno a hinca nan aden.

Belasting.
E motibo cu minister Otmar Oduber y gobierno ta uza pa menasa y retira e contratistanan cu ta traha canto di caminda ta cu nan debe belasting! Niun hende sinembargo ta kere cu esey ta e motibo real pa menasa y pa kita nan fo’i trabou. Loke ta e caso ta cu e minister ta busca luga pa duna amigo y famianan un contract asina. Pa e motibo aki ta kita hende fo’i trabou pa traha luga pa esunnan cu e kier faborece politicamente. Anto ta net e trahadonan cu ta simpatisa cu partido AVP, e minister ta menasa y kita for di trabou. Niun otro!

Abuso di poder y persecucion politico.
Loke minister Otmar Oduber ta haci ta persecucion politico. Pasobra cuanto hende y negoshi no debe belasting? Pero den un pais democratico niun hende tin mag di perde trabou pasobra nan debe belasting? Cuanto hende a perde trabou pasobra nan debe belasting? P’esey e motibo cu e minister ta uza ta ridiculo! Si ta e belasting gobierno kier haya, anto e no ta kita hende for di trabou. Al contrario e ta yega na un areglo pa paga tur luna. Den caso di algun di e trahadonan aki ya tin un areglo di pago y tur luna ta kita un suma halto for di e placa cu nan ta haya. Asina mes ya a kita contract di un di nan. Pa e minister paga belasting no ta basta. E ta kita nan for di trabou y ta menasa otronan cu retiro! Awor sin trabou manera Fachi Tromp, ta con e ta bay paga belasting cu e debe? Pa no papia mes di con e ta bay paga banco pa su cas y su pick-up of con e ta bay cria su famia! Tur esaki minister Otmar Oduber y gobierno di MEPORED no ta tene cuenta cune. Sin niun gevoel of sentido di responsabilidad humano, ta mensa y kita trahadonan di trabou. Awor bou di tur otro contratista y trahado cu contract ta reina insiguridad, temor pa perde trabou, preocupacion pa mantene nan famia y paga nan cuentanan. Cerca hopi ya e temor y preocupacion a bira rabia. Pa hende manera Fanchi y Papi cu tin tanto aña ta haci e trabou aki caba, bou di tur gobierno, ta increibel cu e gobierno di Aruba ta haci esaki cu su propio ciudadanonan. Pero pa nan y otro trahadonan, cos no ta keda akinan!