Dialuna mainta siman a habri cu un bishita di fraccion y miembronan di partido AVP na Aruba Investment Bank (AIB). AIB ta un banco priva cu a wordo lanta pa inverti y financia proyectonan cu ta contribui na desaroyo priva y di henter comunidad. Den pasado AIB a hunga un rol grandi den financia proyectonan rond di Aruba cu te awe ta contribui na nos desaroyo.

E fraccion di AVP encabesa pa mr. Mike Eman a bishita e banco aki den cuadro di e bishitanan cu e fraccion di partido AVP ta haci na instancianan, partnernan y gremionan pa tur hunto mira e pantaya mas grandi di e desaroyo social y economico di Aruba y wak e desconexion cu tin awor entre loke gobierno ta bisa y haci na un banda y loke ta e realidad cu pueblo ta biba aden.

Mike Eman: “Nos sa cu tin un preocupacion hopi grandi den nos comunidad pa e poder di compra cu a wordo enormemente afecta. Costo di bida ta hopi hopi halto. Y nos ta mira cu tin un desconexion entre lo cual gobierno y cierto institutonan tin como cifranan riba e desaroyo di nos pais. Y di otro banda si nos wak e cifranan real di loke ta sosode den pueblo, tin motibo pa hopi preocupacion: pobresa creciente, companianan cu ta cera. Nos ta wak aki den centro hopi edificio bandona. Tambe nos ta na punto di haci un bishita na Hulanda, caminda nos ta bay papia cu amigonan di Aruba na Hulanda pa pone atencion no solamente na e presupuesto di Aruba, pero tambe pa pone atencion na e aspectonan social economico di nos pais. Nos ta wak hopi empresa chikito y mediano cu ta pasando den momentonan dificil. Nos ta mira nos pueblo ta pasando den momentonan dificil. Pero e cifranan di e situacion ey no ta den bista di hopi instituto na Aruba. Na e momento aki ta importante pa na banda di e control riba presupuesto, tin tambe un bista riba e desaroyo social y economico di Aruba.”

Pa trece cambio den e situacion aki, partido AVP a produci un nota pa institui un Social Cultureel Plan Bureau na Aruba cu ta bay tin e tarea pa crea e pantaya mas grandi, mas amplio ey di cifranan di e desaroyo real na Aruba. E plan aki tambe a wordo discuti cu AIB durante di e bishita.

AIB

Mike Eman a splica pakico a bishita AIB: “AIB durante di su existencia semper a tene cuenta cu e aspecto social economico di nos pais. E no ta unicamente un banco comercial cu ta haci tur loke un banco comercial ta haci. Pero semper e tabata un partner den e desaroyo di Aruba den un contexto mas amplio. Na e momento aki nos tin mester di institutonan asina.”

Mike Eman a splica cu AIB por ehempel a hunga un rol grandi den e ehecucion di e Fondo di Desaroyo Aruba cu a haya un evaluacion cu un resultado cu por cualifica como “tien plus” door di un instituto oficial di Hulanda pa e forma cu e banco a maneha e placa di Fondo di Desaroyo Aruba. E Fondo di Desaroyo tabata un fondo di mas di 500 miyon florin cu a wordo inverti den mas di 700 proyecto. Esaki ta segun Mike Eman y AVP un ehempel con pa maneha placa di pueblo den un forma sumamente responsabel y na bienestar di pais y pueblo.

Plannan pa futuro

Partido AVP ta trahando riba plannan nobo pa atende cu e fiansanan cu Aruba a haci. Por ehempel con lo por pone nan den un contexto diferente cu e ta awor aki.

Mike Eman: “Nos tin cu crea un clima pas constructivo, mas positivo den e relacion cu Hulanda. Y esey tambe ta e meta di nos bishita aki na AIB, pa contempla algun idea nobo cu nos a comparti cu nan awe. Y manera nos ta custumbra di AIB, nan tabata tin tambe bon conseho pa mira con nos por incorpora nan den tur e diferente desaroyonan na Aruba, pa nos haya un desaroyo cu realmente ta sirbi e bon comun, e “common good”, e desaroyo general cu no solamente ta mustra bon den cifranan financiero, pero cu no ta traduci nan mes den bienestar general pa henter nos comunidad.”

Mike Eman a enfatisa cu mester reconecta e economia di Aruba y gobernacion di Aruba, na e realidad di nos comunidad. Esey segun Mike Eman ta loke partido AVP ta trahando riba dje.