AVP: ‘Den oposicion nos no lo acepta trikinan di un gobierno instabil’

Ayera mainta ministernan demisionario Arthur Dowers, Mike de Meza y Benny Sevinger a tene un rueda di prensa riba ultimo desaroyonan pa formacion di gobierno nobo. Unda nan ta elabora riba e posicion di nan partido den oposicion.

Nan ta haya esaki importante pa haci segun minister Dowers a declara pasobra pa basta dia tin diferente speculacion andando.
“Ora bo scucha riba cuent’i buraco den presupuesto y busca institucion internacional pa bay haci un estudio, nos ta haya esaki completamente innecesario,” minister demisionario Mike de Meza ta bisa. Akinan e ta referi na dos punto di informador pa busca institucion internacional pa haci estudio riba maneho di Aruba su presupuesto.

El a sigui comenta cu ora cu Gabinete Mike Eman a drenta gobierno no tabata tin cuenta anual.  “For di 1986 te 2011nos a traha jaarrekening pa tur. Y awe nos por ta sumamente orguyoso di bisa cu tur aña tin jaarrekening cu tin cu wordo trata den parlamento. ” Sr. De Meza ta sigui bisa: “Tin informacion. Tin kwartaalrapportage riba un manera hopi detaya. Cft ta duna su rapportnan, scucha gobierno y sinta cu parlamento y tur informacion ta wordo publica. Tin e rapportnan di Standard & Poor’s, rapportnan di Centrale Bank di Aruba, departamentonan di gobierno, SvB , AZV y hopi mas. Kiermen e ta innecesario pa busca hende di afo cu no conoce sistemanan na Aruba pa traha rapport cu no ta bay bisa nada mas diferente cu tur e rapportnan aki ta bisa.”

E mandatario ta bisa cu ‘oposicion’ (MEP etc.) ta buscando hustificacion pa crea oportunidad di bin cu hendenan di afo pa gaña pueblo pa por tuma medida. “Esey ta bay ta inaceptabel sigur pa partido AVP den oposicion. Di akinan mi kier a alerta e gobierno instabil y cu no ta sostenibel ey cu aparentemente  ta bay wordo forma. Nos no ta bay acepta e tipo di trikinan ey.” AVP ta spera cu si e partidonan POR y MEP forma un gobierno cu nan lo por sigui cu trabaonan corecto cu gobierno di AVP a laga atras.

Formacion di gobierno aki ta ‘sistema di flip flop’
Tin diferente punto cu a bin dilanti ultimo dia cu como partido AVP y como gobierno nan mester reacciona riba dje segun minister Dowers a declara ayera.  “Despues di eleccion nos a mira sra. Evelyn Wever Croes bisa cu e kier drenta gobierno mas lihe posibel y p’esey a brasa sr. Oduber pa forma un gobierno. Despues nan a bisa cu nan no tin pura y kier studia cierto cosnan. Y aworaki nan tin pura atrobe mas lihe cu ta posibel. Un sistema di flip flop nos ta mirando pa loke ta trata e formacion di e gobierno aki.”

Minister De Meza a agrega riba esaki bisando: “Bo ta mira caba aworaki tras di cortina ta wordo negosha pa ken ta haya cua ministerio. Mi a kere bo mester sinta prome pa wak riba programa. Ya caba bo ta mira problemanan unda bo ta imagina ki sorto di gobierno ta bay tin den futuro si e tres partidonan aki forma un gobierno. E ta trece un instabilidad sumamente grandi pa gobernacion di Aruba. E no ta bay ta sostenibel y lo hiba nos basta aña atras tambe.”

AVP dispuesto pa sinta cu MEP, no cu POR
Minister Dowers a subraya riba loke nan a bisa formador cu nan ta dispuesto pa combersa cu e partido mas grandi den oposicion na momentonan akinan. “Pa mira si ta posibel cu nan por presenta un programa cu nos ta kere ta aceptabel, cu nos lo por coopera na dje pa garantisa cu e pais aki tin un gobierno stabiel. Y mas cu tur cos un gobierno cu ta confiabel.”A bolbe subraya cu AVP no ta dispuesto pa traha cu partido mas chikito, den e caso aki POR.  Sr. Dowers: “Nos tur sa e historia con el a lanta y cu ki interes. Nos ta sinti cu e partido aki ta encarece di integridad di tal forma cu nos no lo kier forma parti den ningun forma den un coalicion cu un partido chikito asina akinan.”

Presupuesto cu gobierno MEP a laga atras
Minister de Meza ta bisa cu ora nan a drenta gobierno na 2009, mesora nan a wordo presenta cu un presupuesto cu mester a bay parlamento cu ne cu tabata riba 153 miyon florin adicional cu a wordo gasta. “Mi ta corda ora nos a ricibi e presupuesto den concepto pa 2010 cu gobierno di MEP a laga atras cu tabata tin un deficit riba di un mey biyon florin. Den e presupuesto ey nan conseho tabata ta e momento ey pa aumenta BBO for di 3% pa 6% of mas.” Manera cu nan a haci den pasado, nan lo trece e documentonan aki por escrito dilanti pronto. “Mi ta contento pa scucha cu MEP y POR a laga sa cu nan no ta bay tuma medida. Mi ta spera cu nan wanta nan mes na esey tambe. Pasobra lo ta interesante pa mira na ki forma e dos partidonan aki ta bay goberna.”

Proyectonan cla pa ehecucion
Segun minister Sevinger, nan ta preparando como minister tur dossier pa pasa esakinan over. Pues kico nan a haci, kico nan a haya y kico lo laga atras pa e proximo ministernan cu lo tuma nan luga pa nan por drenta y haci nan trabao.
“Contrario na dia cu nos a drenta si bo wak e parti di infrastructura: nos no a haya ningun mapa, ningun plan of nada pa wordo ehecuta of den ehecucion. Aworaki nan nos ta laga hopi proyecto den ehecucion, hopi proyecto cla pa wordo ehecuta. Aworaki ta pa nos wak y bay vigila con nan ta bay ehecuta esakinan pasobra ta facil pa pidi stuur di auto, pero mester sa core e auto si. Esey mi ta mirando na momentonan aki no ta e caso.”