Den poco tempo a logra di hiba combersacionnan cu tabata hopi fructifero. Segun parlamentario Robert Candelaria di AVP, a cuminsa cu combersacionnan diamars mainta cu prome minister di Corsou y a aprecia hopi cu a pesar di su agenda hopi yen, a traha tiki tempo pa por a sinta cu nan y por a delibera riba desaroyonan cu a mira na Aruba, Corsou, pero tambe splicando loke ta bay haci awor aki, cu ta e participacion na e conferencia di ODCA.
E prome minister Rugghenaat a aprecia hopi e topico aki y a brasa e idea pa bin cu formacion pa politiconan y esunnan interesa den politica. Tabata tin despues di esey algun entrevista cu a logra. Loke tambe tabata hopi bon, ta cu a logra topa cu casi tur colega parlamentario di Corsou. A bishita nan un rato na parlamento di Corsou cu tabata tin un reunion y hasta tabata tin un schorsing un rato.
A papia, intercambia riba hopi cos den e rato ey y diamars, prome cu a sigui cu e biahe pa Costa Rica, a papia un rato cu Etienne Ys, cual tambe ta un ex prome minister na Corsou. Tambe un combersacion di bon contenido caminda cu por a refleha riba desaroyonan y tambe mira pa dilanti den cua direccion lo kier bay. Den liña grandi, loke por a mira dialuna y diamars, ta e ideologia Cristian Democrata, tin un base fuerte den nos comunidad.
E ta parti di nos historia, parti di nos cultura. Awor aki, hunto cu e delegacion di Corsou di partido Nacional, cual ta Maria Liberia Peters hunto cu Ruthmila Larmonie y di Boneiro, Hans Els di UPB, a bay hunto pa participa na e conferencia di ODCA na Costa Rica.
