Tanto Minister di Husticia Andin Bikker (POR) como Ministerio Publico (OM) a declara awe cu e noticia di un supuesto detencion di un alto funcionario di gobierno di Aruba y confiscacion di un avioneta pa via di contrabanda di oro di Venezuela ta falso. Segun Runrun.es y El Impulso, e informacion aki lo a origina di periodista Casto Ocando, den portal Primer Informe.
E declaracion di Ministerio Publico, como tanto di e minister, ta indica cu nunca a detene ningun alto funcionario di gobierno den un caso di contrabanda di oro, ni cu a detene e piloto y pasaheronan di e avioneta supuesto aki. E noticia cu a circula originalmente tabata papia di un cantidad di casi un tonelada di oro. Tambe lo a papia cu esaki tabata riba orden di Merca, cual no a resulta di ta berdad, segun e mandatario, despues cu nan a check cu oficialnan Mericano.
Sinembargo, den cuminsamento di luna di februari, mas o menos dos siman pasa, si a para un avioneta na aeropuerto, pero esaki a tuma luga pasobra e avioneta en cuestion a viola e ley di aviacion (Luchtvaartverordening), segun vocero di Ministerio Publico Ann Angela. Bikker mientrastanto a aludi cu esaki lo tabata pasobra e avioneta no tabatin registracion, cual ta contra e ordenansa menciona.
Actualmente tin un prohibicion temporal riba importacion y exportacion di oro procediente di Venezuela, a base di e Regeling verbod in-en uitvoer goud Venezuela III (AB 2020 no. 16). Gobierno ainda ta sondeando si lo bay haci esaki ilegal pa temporada indefini.
