Avion di Tiara Air a logra aterisa despues di complicacion cu motor

Ayera atardi un avion di Tiara Air tabata rekeri asistencia di bombero ora a purba sali di Aruba pero a confronta problema cu motor y mester a bin bek.    

Pa mas o menos 3or di atardi e avion modelo Shorts 360 di e agencia di biahe cu pa algun tempo a declara bancarota a haya poco problema durante oranan di atardi cu motor despues di bula pa algun tempo. Vocero di Cuerpo di Bombero Ferdinand Ponson a conta Bon Dia Aruba cu e avion a haci un yamada pa Aruba despues cu a haya problema cu motor. Aparentemente e avion tabata tin lek na cierto parti, pues e piloto a dicidi di paga esaki. Pero el a logra aterisa bon maske tabatin fayo cu e avion.

Aunke e agencia di biahe cual a declara bancarota basta tempo pasa no tin mag di bula comercialmente, vocero di Aruba Airports Authority Hendrik Croes a splica cu den cierto casonan avionnan asina por pidi pa permiso pa bula en caso cu mester haci reparacion na otro pais, etc. “Simplemente no tin permiso pa haci vuelo comercial, pero pa otro tipo di vuelo por pidi permiso.” Den e caso aki sr. Ponson a informa cu e tabata un test flight unda tabatin 3 hende a bordo. “Danki Dios nan a aterisa sin problema”, sr. Ponson a termina bisando.