Un avion tipo Boeing 737 di e aerolinea Mericano Miami air, cu 143 pasahero abordo a aterisa den un riu na e estado di Florida. un total di 21 persona cu heridanan leve a ser transporta pa hospital.
E avion aki ta uno cu tabata ehecutando un vuelo di charter, bayendo for di e base militar Guantanamo Bay na Cuba, direccion pa un otro base militar na Jacksonville. Durante e aterisahe algo a bay robes, poniendo cu e avion mester a baha den e riu di Saint Johns. Aparantemente, e causa lo tabata tin di haber cu un rafaga di biento.
Door cu e avion a keda practicamente intacto y tabata riba e superficie di awa, por a evacua tur pasahero sin ningun problema. A pidi asistencia di bomberonan pa por recolecta e gasolin cu a lek den e riu. Tur e pasaheronan abordo ta personanan cu ta den servicio di e militancia Mericano. Awo mester haci un investigacion pa wak kico a bay robes durante e aterisahe.
