Un avion a crash na e aeropuerto internacional di Dubai, matando 4 persona. E suceso a stop trafico di e aeropuerto mas ocupa di mundo pa biahe internacional pa un ora.
Autoridad no tin splicacion pa kico a causa e accident di avion Diamond DA62, e ta pertenece na ‘Flight Calibrations Serrvice Ltd, di Inglatera. Autoridad General di Aviacion Civil a bisa cu esunnan cu a fayece ta di nacionalidad Britanico, y un Sur Africano.
Diabierna mainta, polis, paramedico y investigado di aviacion a traha na e luga di accidente. Polis a bisa e periodista di AP cu nan no por drenta e localidad, cual ta scondi di bista pa motibo di tera halto.
Flight Calibrations Service Ltd a anuncia na november un contract pa traha riba e ‘navaids’, e luznan cu ta duna señal di unda e avion tin cu para. Aeropuerto Internacional di Dubai a bisa cu e avion tabata wordo uza pa calibra e sistema di acercamento.
Un trahado di e compania, kende tin dos avion Diamond DA62 na e aeropuerto, a nenga di duna comentario di e accident. E trabou cu e luznan ta yega na momento cu Dubai a cera nan pista pa drecha e infrastructura di iluminacion y sosten. Nan ta spera di habri esaki bek dia 30 di mei proximo.
Dubai a reduci algun biahe programa y a dirigi na otro di aeropuerto di Al Maktoum na Dubai World Central, e di dos aeropuerto di e ciudad. Dubai ta un ciudad di suma importancia pa Emirato Arabe Uni, un federacion di 7 pais na e peninsula Arabe.
