Ultimo ora: Segun autoridadnan Cubano tabatin solamente tres sobreviviente den e desaster aereo.
Un avion di Cubana de Aviacion, cu a lease di e compania Mexicano Aerolineas Damojh, cu tabatin 113 persona a bordo, entre pasahero y tripulante stranhero, a cay diabierna den su salida di Aeropuerto Internacional José Martí na La Habana, Cuba, segun agencia AFP. Ta supone cu tin un gran cantidad di morto, presidente di Cuba, Miguel Diaz-Canel, a declara.
“A sucede un lamentable accidente di aviacion. Segun e personal di Cubana tin 104 pasahero cu nuebe persona di tripulacion. E noticianan no ta nada halagador, parce cu tin un cantidad halto di victima,” Diaz-Canel a bisa despues di yega na e lugar di e accidente, segun e agencia di noticia AFP.
Un Boeing 737, cu destino Holguín (oriente di e pais) a cay poco despues di a lanta vuelo, segun fuentenan di e aeropuerto y testigo na agencia AFP.
Den cercania di aeropuerto José Martí por a observa un intenso columna di huma y numeroso grupo di bombero, polis y asistencia medico ta den e zona den trabao di rescate. No a divulga noticia ainda tocante e cantidad di morto.
Segun television estatal Cubano, e aeronave a bin cay entre e localidadnan di Boyeros y Santiago de Las Vegas, despues di lanta di aeropuerto internacional José Martí.
