Desde ayera diamars Avianca lo a cuminsa drenta piloto stranhero pa Avianca por spera di normalisa nan operacion, despues di 13 dia di huelga di e Asociaciacion di Aviador Civil y Comercial, Acdac.
Fuentenan di e aerolinea a informa cu esakinan lo keda incorpora paulatinamente y cu no ta necesario contrata personal nobo, sino cu lo acudi na piloto di e grupo Avianca Holdings.
Avianca a informa cu tin 1.800 candidato den proceso di seleccion, y cu e medida aki “ta complementa pa e plan di contratacion di piloto Colombiano nobo,” cu ya ta na marcha.
Ayera, Aeronautica Civil a informa su decision di permiti e aerolinea contrata personal y avion stranhero desde 8:00 a.m. di 3 di october, medida cu lo inicia cu e yegada inmediato na Colombia di tripulacion di otro empresa di e grupo empresarial, cu lo incorpora den servicio riba vuelo local y internacional.
E reglanan poni pa Aerocivil pa permiti e contratacion di stranhero ta stipula condicion, por ehemplo cu den e cabina mester tin por lo menos un tripulante Colombiano y cu e tripulante stranhero ta certifica pa papia Spaño. Den caso cu no ta asina, e mester ta certifica pa domina Ingles y solamente lo por opera na aeropuertonan internacional.
Adicionalmente, nan mester presenta na Aerocivil nan respectivo licencia, emiti pa e pais di origen, como tambe nan certificado medico. E pilotonan stranhero tambe mester ricibi entrenamento den regulacion aereo Colombiano y pasa un test riba ruta cu un instructor certifica.
“E aprobacion di e solicitud aki di parti di Aerocivil ta facilita nos reanuda gran parti di e vuelonan na Colombia. Avianca, cu su operacion na varios pais den region, tin piloto altamente califica cu nan lo mobilisa awe mes (ayera, diamars) pa reforsa operacion den e pais.”
Tambe, e compania a destaca cu nan ta “verificando den mercado e disponibilidad di piloto den companianan cu ta conta cu tripulacion califica pa reforsa operacion desde y pa Colombia.”
Aunke mester confirma ainda di ki nacionalidad nan lo ta, ta probable cu hopi lo ta di Peru y Centroamerica, ya cu e compania tin centro di operacion na El Salvador y Lima.
E Asociacion di Aviador Civil y Comercial, Acdac, a lamenta e decision di Aerocivil, considerando cu “evidentemente ta desconoce loke ta stipula den ley y normanan manera e Codigo Sustantivo di Trabao, cu ta prohibi reemplasa trahador cu ta den huelga.”
Den un comunicado nan ta afirma cu estado “ta na banda di e empresa cu ta viola derecho laboral y derecho di e trahadornan.” Ademas, a anuncia cu nan lo sigui cu caso administrativo y huridico di cualkier forma.
