Desde diaranson pasa mas cu mita di e pilotonan di e aerolinea Avianca ta den welga. Esaki tambe ta afecta clientenan na Aruba. Sinembargo e servicio, siguramente pa esunnan cu a book via internet, nan ta keda perhudica.
Segun e oficina na Aruba cu ta situa na aeropuerto nan tin nan man den cabes, asina nan ta bisa un cliente, como cu nan mester yama mas cu 700 persona na Aruba pa resolve e problema di vuelonan cancela, etc. E cliente mes no a wordo yama y despues cu diamars e mes a tuma contacto como el a haya sa di e welga, e ora e oficina a inform’e. Mientrastanto otro comunicacion, entre otro di ticket, si tabata bay via mail.
Akinan e oficina no por a yuda di biaha e cliente kende a puntra kico e por haci, como cu diasabra awor e lo bula cu su famia pa Bogota. E trahado e ora a recomenda pa cancela e vuelo como cu no tabatin garantia pa asina por regresa Aruba. Asina e cliente ainda por a logra di cancela entre otro su hotel, sino el a bira hopi dificil. Dicon Avianca no a avisa mas trempan, no ta conoci.
Pero un bishita na e oficina di Avianca na Aruba a mustra bon cla: nan no ta dunando servicio y siguramente no ora ta trata di clientenan cu a book nan vuelo via internet. Nan ta indica cu e ora no por yuda na e oficina local pasobra tur cos e ora ta bay via e oficina na Colombia. Tambe e parti di duna placa bek y por ehempel un prueba na escrito cu Avianca a cancela e vuelo pa e cliente. Nan a indica si cu pa haya e placa bek, esaki lo tuma 20 dia. Con e ta bay ora di book cu internet, nan no por bisa. Nan a duna informacion di contacto pa call center na Colombia y tambe pa un contacto cu nan mes ta uza, sinembargo e numbernan no ta wordo contesta.
Asina e oficina di Avianca na Aruba ta mustra bon cla: esun cu ta cumpra un ticket na e oficina aki por haya nan placa bek via nan. Sinembargo esaki no ta conta pa esunnan cu ta book via internet; nan ta depende di e oficina na Colombia. Riba nan website tabatin un formulario pa pidi cen bek, sinembargo nan a suspendi esaki te 5 di october.
