Viviana Martin presidente y gerente general di Avianca Costa Rica a haci un bishita cerca gobierno di Aruba pa informa cu Avianca ta bay amplia su vuelonan pa Aruba, desde 17 di april cu 4 vuelo extra pa Colombia. Esaki lo nifica un total di 11 vuelo pa siman.
E 4 vuelo ta zorg pa 480 stoel extra pa siman. “Semper cu nos reuni cu autoridadnan di Aruba un bes pa aña, ta pasa algo positivo. Awor tin shete vuelo pa siman di Avianca pa Colombia y nos a wordo pidi pa aumenta e vuelonan aki mirando cu na Aruba tin un comunidad grandi di Colombiano. Nos a haci un revision y awe nos por trece bon noticia pa Aruba. Desde 17 di april nos ta bay aumenta e vuelonan cu 4 extra. E extra vuelonan aki ta bay ta riba diabierna, diasabra, diadomingo y dialuna den oranan di mainta”, segun sra. Martin.
Prome Minister Eman a bisa di ta masha agradecido pa e decision importante aki di Avianca. ” Tin un cantidad creciente di pasahero cu ta bin di Estados Unidos y cu ta interesa den biahenan combina. Colombia ta un destinacion ideal pa nan. Prome nan ta bin aki pa disfruta di nos beachnan pa sigui pa Colombia pa gosa di e naturalesa y eco turismo eynan.”
