E compania aereo Avianca, un socio strategico di Aruba su turismo, a dicidi di adopta e ley di bancarota na Merca. Sinembargo nan a laga sa cu e decision aki no ta afecta su operacion na Colombia. Pero nos pregunta ta: Con e decision aki lo afecta Avianca su operacion aereo pa Aruba?
Contestando e pregunta aki, directora di Aruba Tourism Authority (ATA), Ronella Tjin Asjoe-Croes, a declara na Bon Dia Aruba cu den principio e decision di Avianca pa aplica na e ley di bancarota, no ta afecta su operacion pa cu Aruba. Esaki den sentido di loke Avianca tabatin plania aworaki como parti di e reapertura di Aruba su turismo.
E compania di aerolinea aki tin como parti di e reapertura di nos frontera y e lantamento di e lockdows -cu tentativamente lo tuma luga entre 15 di juni y final di e mesun luna- dos vuelo semanal. “Esaki ta loke tin poni te cu aworaki como reservacion pa Aruba,” el a declara.
Avianca a yega di reitera cu tur cos lo sigui normal den sentido di servicionan poni te cu aworaki tambe. Nan a informa cu nan a adopta e ley di bancarota di Merca pa e mesun proteccion di e compania, pa asina nan por sigui cu nan plan di reorganisacion. Esaki tabata e informacion cu directora di ATA ta dispone di dje tocante Avianca su operacion di vuelo pa Aruba.
Segun informacion divulga den medionan di comunicacion internacional manera RCN di Colombia, ta indica cu esaki ta e di dos biaha cu Avianca ta adopta e figura huridico di bancarota na Merca. E prome biaha a sucede na aña 2003, caminda Avianca Holding a haci uzo di e capitulo 11 of ley di bancarota na Merca.
Pa Avianca e uzo di e figura huridico lo yuda e compania pa pone fin na cierto incertidumbre financiero cu varios aerolinea ta pasando aden actualmente, debi na e crisis di coronavirus/Covid-19. Ya cu di e forma aki nan ta haya un plan di proteccion pa pone na ordo nan compromisonan. Mientras cu nan lo sigui opera den nan mercadonan cu excepcion di Peru, caminda nan ta bay cera e compania di Avianca Peru SA.
