Den su resumen diario riba desaroyonan di pandemia di Covid-19 na Aruba ayera, Departamento di Salubridad Publico (DVG) a indica cu segun su datonan, e averahe semanal di casonan nobo pa dia ta 11 caso.
Riba diabierna e cifra aki ainda tabata na 13 porciento.
Ademas DVG a informa cu e averahe semanal di tasa di positividad, esta e cantidad di test positivo den tur e test haci, ta di 7 porciento pa dia.
Segun e resumen di DVG ayera, 16 persona a recupera, mientras cu a registra un total di 7 caso nobo di Covid-19, di cual un persona no ta residente di Aruba. E cifranan aki ta representa un tasa di positividad entre nos residentenan di 9 porciento.
E cantidad di casonan activo ayera tabata 144, y e cantidad di fayecidonan relaciona cu Covid-19 ta keda na 172.
Actualmente tin 9 persona hospitalisa na Aruba pa ricibi tratamento pa Covid-19, e malesa causa pa e virus SARS-CoV-2. Di esakinan, un ta den Unidad di Cuido Intensivo (ICU) mientras ocho ta riba piso general. Na Colombia tin actualmente 10 pashent di Aruba hospitalisa den ICU, y otro dos riba piso general.
