Maske e pandemia di Covid-19 ta bao control riba nos isla, e casonan no a yega na cero y keto bay tin hende ainda ta contagia cu e coronavirus. Den su resumen diario riba desaroyonan di e pandemia, Departamento di Salubridad Publico, DVG, a indica cu e averahe semanal ta di 17 caso di Covid-19 pa dia.
Ademas tin averahe semanal di tasa di positividad di 10 porciento pa dia. Esaki ta indica den cifranan di DVG. Ademas den su resumen di ayera, e Departamento a indica cu 10 persona a recupera di Covid-19, mientras cu a registra un total di seis caso nobo di e malesa causa pa e virus SARS-CoV-2, di cual uno no ta residente di Aruba.
E cantidad di caso activo pa ayera tabata 171, y e cantidad di fayecido relaciona cu Covid-19 no a conoce aumento y ta na 171.
Ademas DVG a informa cu actualmente tin na Aruba 10 persona interna den hospital pa ricibi tratamento pa Covid-19. Di esakinan, tres ta den Unidad di Cuido Intensivo ICU, mientras 7 ta riba piso general. Tambe na Colombia tin actualmente 11 pashent di Aruba hospitalisa den ICU y otro 2 riba piso general.
