Segun resumen diario di Departamento di Salubridad Publico DVG riba e desaroyonan di pandemia di coronavirus na Aruba, datonan ta mustra cu tin un averahe semanal di 11 caso nobo di e malesa causa pa e virus SARS-CoV-2 cada dia na Aruba.
Ademas tin un averahe di tasa di positividad semanal di nuebe porciento pa dia.
DVG a informa tambe cu segun su resumen di ayera, 15 persona a recupera di e malesa, mientras cu a registra cinco caso nobo di Covid-19, di cual uno no ta residente di Aruba. E cantidad di casonan activo pa ayera tabata 137, y e cantidad di fayecidonan relaciona cu Covid-19 ta 172 despues cu a registra un fayecido mas riba diabierna.
Di mesun manera, DVG a informa cu actualmente tin nuebe persona interna den hospital pa ricibi tratamento pa Covid-19. Di esakinan, dos ta den Unidad di Cuido Intensivo (ICU) mientras cu siete ta riba piso general. Tambe na Colombia actualmente tin dies pashent di Aruba hospitalisa den Unidad di Cuido Intensivo, y otro dos hospitalisa riba piso general.
