E siman aki durante un conferencia di prensa riba recuperacion di pais Aruba despues di pandemia di Covid-19, prome minister demisionario, Evelyn Wever-Croes a duna informacion riba e parti di salud.
Wever-Croes a indica cu actualmente tin un averahe di 4 caso pa dia, cu mientras cu lo prefera tin ningun caso, e cantidad aki ‘nos por maneha bon’.
Segun resumen di Departamento di Salubridad Publico DVG, ayera tabatin 4 caso nobo di Covid-19, tur residente, mientras dos persona a recupera. E cantidad di caso activo tabata 31.
Wever-Croes a comenta tambe cu e pandemia ta bao control danki tambe na e grado di vacunacion, cu actualmente ta 67-68% y entre e grandinan ta 72%.
Igualmente Wever-Croes a informa cu despues di dia 1 di juli e maneho di vacunacion ta bay cambia, unda ta bay tin otro manera pa yega na esnan cu ainda kier vacuna. El a curasha principalmente esnan cu tin plan di bay cu vakantie den temporada proximo, pa acerca e centronan di vacunacion, Sporthal St. Cruz na Centro Deportivo Libertador Betico Croes, unda cu ainda por yega facilmente vacuna sin tin mester di haci cita adelanta. Despues di dia 1 di juli e vacunacion ‘probablemente’ lo bay via cita.
Ademas, Wever-Croes a indica cu Crisis Team tin riba agenda e eliminacion di e reglanan di pandemia, cu e meta di eventualmente elimina tur medida.
