Cuminsando dia 1 di januari 2024, a drenta na vigor un decreto nobo cu ta autorisa Gobernador di Aruba, Su Excelencia Alfonso Boekhoudt pa haya acceso na e base di registro Hulandes pa procesa solicitudnan pa paspoort Hulandes.
E decreto en cuestion, publica den e Staatscourant dia 28 di december ultimo, ta permiti Gobernador di Aruba pa solicita sistematicamente e datonan necesario pa ricibi, evalua, otorga y agilisa paspoortnan nacional, segun e Ley di Paspoort (Paspoortwet).
E decreto en cuestion ta e resultado di un solicitud di Gobernador di Aruba di dia 21 di november 2023, dirigi riba Servicio di Registro Civil y Registro di Poblacion. E ta forma parti di un esfuerso pa haci emision di paspoort mas eficiente y efectivo.
E decreto ta destaca e necesidad pa precision y atencion na momento di proporciona e datonan sensible aki, y ta inclui condicion pa uso y seguridad di e informacion en cuestion.
Cu e decreto aki, manera menciona, Gobernador di Aruba ta habilita pa solicita datonan relevante di e base di registro di persona, cual ta esencial pa e investigacion di identidad of ciudadania di un solicitante di paspoort. Esaki ta inclui e provision di datonan den casonan den cual e tata di e solicitante ta involucra, y na momento cu e provision di datonan ta necesario pa investigacion di nacionalidad of identidad di e solicitante, of pa verifica si e tata tin autoridad riba e solicitante.
