Director di Cuerpo di Investigacion Cientifico, Penal y Criminalistico (CICP) di Venezuela, Douglas Rico mediante un publicacion riba su rednan social a informa cu cinco homber di nacionalidad Venezolano a keda deteni. Nan ta responsabel pa e desaparicion di Leidy Yohana Salazar de Moreno di 40 aña y nan a keda deteni pa Delegacion Municipal di Punto Fijo.

Salazar de Moreno a desaparece na luna di maart ora el a sali cu boto for di Puerto Escondido cu destino Aruba, pero nunca el a yega na Aruba.

Autoridadnan Venezolano ta den buskeda di e Arubiano, R. Stamper, ken ta sospecha di ta involucra den traficacion di hende, specificamente den e caso aki di Salazar di Moreno. Noticiero Venezolano ta indica cu Stamper tabata conduci e boto den cual Salazar de Moreno a subi na mita di caminda pa direccion Aruba, pero nunca el a yega y te ainda e ta desapareci.

Segun Rico a sigura, mientras funcionarionan di CICPC tabata realisa un patruyahe cibernetico por medio di un website, nan a haya sa di e desaparicion di Salazar, na unda nan a cuminsa e investigacionnan corespondiente cu entrevista y analisis telefonico. Den esaki, nan a logra e identificacion y detencion di Edirso Segundo Colina Rodríguez, di 42 aña, ken tin dos registro pa delito di contrabanda; José David Colina Borges, di 25; José Daniel Colina Borges, tambe di 25; Alcides Rafael Lugo Martínez, di 24 y Eudomar José Arias Guanipa, di 30 aña.

Tambe el a bisa cu e cinco persona aki a ofrece na Salazar de Moreno e traslado te Aruba den un boto for di e sector Puerto Escondido, parokia El Vinculo, municipio Falcon hasta awanan teritorial entre Venezuela cu Aruba. Na momento cu nan a topa cu Kustwacht nan a haci un trasbordo pa otro boto cu te ainda no a keda identifica y cu ta di Aruba, cual tabata conduci pa e Arubiano R. Stamper, ken autoridadnan Venezolano ta buscando pa su vinculo den e caso aki y posibel extradicion.

Segun informacion cu Bon Dia Aruba a haya di un fuente, tabatin un discusion fuerte cu e capitan di e boto ora cu Salazar a haci trasbordo den awanan teritorial di Aruba. Den esaki, e fuente a indica cu na prome instante e palabracion tabata pa Salazar entrega 2.500 dollar pa por yega Aruba, pero e no a haya e cantidad aki completo, e tabatin 2.300 dollar so.

Tambe e fuente a sigura na Bon Dia Aruba cu tin sospecho cu un otro Arubiano di inicialnan R.L. tambe ta involucra den e caso aki y tabata acompaña Stamper na momento cu Salazar a haci e trasbordo.

Cachonan di Polis Cientifico a confisca como evidencia un boto di nomber “D Mis Nietos” cu un motor y un telefon propiedad di Segundo, ken ta e doño di e boto aki.

E caso aki ta den man di Ministerio Publico cincunscripcion Hudicial Penal.

Hechonan

Tabata dia 22 di maart cu Leidy Johana Salazar, pa 6or di mainta, a sali for di Puerto Escondido caminda pa Aruba cu boto sin avisa ni un hende, ni su famia mes, ya cu tabata un biahe clandestino. Nan a haya sa di su desaparicion den oranan di atardi.

Den e dianan ey, familiarnan di Salazar a tuma contacto cu diferente medio di comunicacion local na Aruba pa asina duna e informacion cu nan tabata sospecha cu Salazar por a bira victima di trata di persona.

Un familiar a conta na redactor di Bon Dia Aruba cu Salazar a sali for di Puerto Escondido estado Falcon caminda pa Aruba cu boto trempan mainta. Igualmente el a indica cu “Kustwacht tabata persigui e boto y p’esey e capitan a dicidi di bent’e den lama, pa asina e por scapa di wordo gara. Despues cu autoridadnan a check e boto, segun e capitan mes a bisa, el a bay back na unda el a laga Salazar, aproximadamente 100 meter di e oriya. Aunke e tabatin su vest bisti nos no sa si el a hoga y su curpa ta flotando den awa, pero ni un caminda por hay’e. Tampoco nos no sa si el a logra di yega na tera of otro boto a gar’e y bay cune. Nos ta pensa cu si esey a pasa, e ta victima di secuestro di trata di hende, pasobra si el a yega caba y ta scondi, e por a comunica cu nos via otro telefon. Pero esey no a pasa y nos ta preocupa,” el a bisa na e momento ey.

E situacion di personanan cu ta drenta di manera ilegal cu boto na Aruba ta keda un topico vigente. Lastimamente hopi persona ta pone den riesgo nan bida den awanan peligroso entre Venezuela cu Aruba y tambe Corsou, na unda e situacionnan manera esaki ta tuma luga.

Un di e Arubianonan involucra a keda deteni na Venezuela pa otro caso

Tabata na luna di maart di aña 2020 ora varios piscado di Aruba a sali bay pisca den awanan teritorial entre Venezuela cu Aruba, na unda di nan a perde y no aparece mas. Medionan local a informa cu den esaki tambe tabata involucra R. Stamper, ken a keda deteni na Venezuela pa varios luna, acusa pa autoridadnan Venezolano di a drenta Venezuela di manera ilegal.