Mediante un comunicado di prensa di dialuna marduga, Wardacosta a informa cu a haya un notificacion di Cuerpo Policial di Aruba cu personanan indocumenta a logra subi tera den area di Vader Piet.
E dos persona cu a duna e declaracion na un persona local, a indica cu nan a bini cu un lancha, pero esaki lo mester a bolter riba lama. Mesora Wardacosta a saca unidad di tera pa bay tira un bista den e area. Na yegada na e area panort di Aruba e agentenan di Wardacosta a detecta dos curpa sin bida den lama.
A entrega e dos curpanan di hende muher sin bida na Cuerpo Policial di Aruba.
Despues di esaki Cuerpo Policial di Aruba a dirigi nan helicopter y Wardacosta tambe a dirigi su patruyanan di tera pa sigui cu e buskeda pa mira si ta encontra mas persona.
Durante e buskeda dialuna durante dia, a mira un curpa mas sin bida riba lama, pero no a logra saca e curpa aki for di lama.
Dialuna den oranan di anochi, helicopter di Wardacosta a saca un curpa di hende homber sin bida for di lama na parti nort di Aruba relaciona cu e caso ariba menciona.
Ayera diamars parti mainta a bolbe haya un curpa sin bida den lama. Autoridadnan a logra saca e curpa y a entrega e na Cuerpo Policial di Aruba pa por sigui cu e investigacion den e caso aki.
Di e ultimo curpa sin bida no tin informacion di e sexo.
En total durante e siman aki ya a haya 4 curpa sin bida riba lama.
Reportahe for di Venezuela
Mientras tanto ta keda e pregunta si lo haya mas curpa relaciona cu e incidente aki. Reportahenan for di Venezuela ta indica cu tabata trata di un lancha cu lo a naufraga y cu tabatin mas hende abordo.
Segun El Regional del Zulia, tin luto na Las Cumaraguas, municipio Falcon. Y a pesar di e hecho cu, pasobra ta trata di transito ilegal y contrabanda di persona, no tin mucho informacion oficial, na momento cu e incidente a bira conoci, informacion tabata circula den boca di hende na e peninsula, indicando cu riba diasabra y diadomingo tabatin varios lancha y barco a sali pa haci e biahe for di Venezuela pa Vader Piet.
Segun El Regional del Zulia, “algun version extraoficial ta indica cu diasabra a sali un lancha cu hende for di El Hato, Santa Rita y otro comunidadnan cercano, pero no tabatin reporahe actual di e embarcacion. Otro tres lancha a sali diadomingo for di zona di Tumatey, pero pa motibo di mal tempo, dos a bolbe y un a sigui bay. Esaki lo ta esun cu a naufraga, segun fuentenan di polis” a indica na medionan local.
Ademas, na Cumaraguas a circula for di dialuna tardi potret di loke lo ta dos di e inmigrantenan fayecido den e tragedia aki. Un di nan lo ta Alexandra Lugo y e otro Maria Virginia Martinez. Ambos mama di yiunan muhe cu awo a keda huerfano. Sinembargo, no ta conoci cuanto hende tabatin abordo di e lancha cu a naufraga y pues ta dificil pa stipula cuanto persona ta desaparecido te awo.
