(AP)—E corte supremo di Rusia a bisa ayera cu el a ricibi un peticion for di e oficina di fiscal general relaha un prohibicion riba e Taliban na Afganistan, ken a ser considera dos decada pasa como un grupo terorista.
E corte a bisa den un declaracion cu e lo tene un audiencia riba e peticion, entrega pa Fiscal General Igor Krasnov, dia 17 di april. Rusia a adopta aña pasa un ley stipulando cu e designacion oficial di terorista di un organisacion por ser suspendi pa un corte.
E Taliban a yega na Rusia su lista di organisacionnan terorista na 2003. Cualkier contacto cu gruponan asina ta castigable bao ley Ruso. Na mesun momento, e delegacion Taliban a atende varios forum organisa pa Moscu. Oficialnan Ruso a descarta preguntanan tocante e aparente contradiccion por medio di enfatisa e necesidad pa traha cu e Taliban pa asina yuda stabilisa Afganistan, cual e grupo ta goberna.
E Union Sovietico a bringa un guera di 10 aña den Afganistan cu a termina den Moscu retirando su trupanan na1989. Desde e tempo ey, Moscu a haci un regreso diplomatico como un mediador di poder, organisando discusionnan riba Afganistan envolviendo representantenan mayor di e Taliban y nacionnan den bisindario.
Tin un division profundisando den comunidad internacional tocante con pa aborda e Taliban, ken tin tres aña den poder y no ta enfrenta oposicion. E gobernantenan di Afganistan a persigui relacion bilateral cu podernan grandi den e region. Den e ultimo añanan, e nacionnan Centro Asiatico di Kazakhstan y Kyrgyzstan a kita e Taliban for di nan lista di gruponan di terorista.
Ainda tin sancion di e Organisacion di Nacionnan Uni (UN) riba e Taliban.
