(AP) – Autoridadnan Mericano anti-competencia a dicidi di investiga e rolnan di Microsoft, Nvidia y OpenAI cu a forma parti di e boom di inteligencia artificial, segun personanan familiar cu e accionnan pendiente.
E Departamento di Husticia lo lansa un investigacion contra creador di chip Nvidia, mientras Federal Trade Comission lo evalua parternan di negoshi cercano manera Microsoft y creador di ChatGPT OpenAI, segun dos persona cu no tabatin autorisacion pa papia tocante e detayenan di e investigacionnan publicamente a conta The Associated Press.
Nvidia y OpenAI a nenga duna comentario diahuebs. Microsoft no a responde inmediatamente na peticion pa comentario.
New York Times tabata prome pa reporta e noticia diahuebs tocante un trato entre e reguladornan anti-competencia na e dos agencianan.
Respalda pa President Joe Biden su empuhe pa critica mas fuerte di e practicanan di negoshi di companianan di tecnologia grandi, oficialnan federal a señala pa mas di un aña cu nan tin tempo pendiente pa e comportamento monopolistico di e industria di chatbot y otro productonan di AI generativo cu ta keda avansa y por produci texto, imagen y zonido similar na esun di ser humano.
Lina Khan, president di FTC, a bisa den januari cu e agencia lo evalua tratonan cu “ta permiti e agencianan dominante eherce influencia of ricibi acceso di privilegio den maneranan cu por stroba competencia husto.”
FTC a bisa na e tempo aki cu nan lo cuminsa un investigacion tocante e relacionnan entre e companianan chikito di inteligencia artificial manera OpenAI y Anthropic y proveedornan di servicionan di cloud manera Amazon, Google y Microsoft cu a inverti biyones di dollar den nan.
Microsoft su relacion cu OpenAI tabata particularmente cercano, dunando e compania chikito di San Francisco cu e recursonan amplio di computer cu e tin mester pa train e sistemanan manera ChatGPT.
