(NLTimes) – Autoridadnan na Hulanda ta sigui cay corto di nan propio metanan pa procesa casonan di crimen sexual, sin cumpli cu e normanan poni na 2019, segun un informe interno obteni pa NOS Nieuwsuur. A pesar di algun mehoracion den tempo di procesamento di caso, polis, Ministerio Publico (OM), y poder hudicial ainda no a logra e metanan acorda. No obstante, oficialnan a dicidi fin di aña pasa pa no ahusta e metanan existente.

Bou di e guia di 2019, 80% di e rapportnan di crimen sexual mester progresa di polis pa OM, di OM pa corte, y finalmente conduci na un veredicto dentro di un periodo di tempo stipula. E medidanan aki a ser introduci pa acelera husticia pa victimanan. Sinembargo, solamente e poder hudicial a yega cerca di cumpli cu e referencianan estableci.

“Esaki ta hopi decepcionante pa e victimanan. Mi ta haya dificil pa splica nan”, segun Rosa Jansen di Victim Support Netherlands. “Nos a bin ta papia di reduci e tempo di procesamento pa hopi tempo caba, specialmente den casonan di crimen sexual debi na nan severidad.” Jansen a enfatisa cu e metanan mester ser alcansa, señalando cu fondonan significante di gobierno a ser aloca pa aumenta capacidad di investigacion. “Bo no por djis bisa cu e metanan ta existi. Nan mester ser alcansa.”

E fayo continuo pa cumpli cu e normanan aki ta ser atribui na multiple factor, incluyendo un scarsedad di investigadonan specialisa y casonan cu ta birando mas y mas compleho. “Loke nos ta priorisa no ta solamente velocidad, pero tambe detaye den atende casonan,” asina Caroline Monster, hefe di e Team Nacional di Experticio pa Ofensanan Sexual na polis a bisa. “Nos mester percura pa ora un dossier di caso yega na hues, e pruebanan ta mas completo posibel”.

E poder hudicial y polis ta sostene cu e metanan actual ta realistico y a resisti yamadanan pa cambio. OM no a declara si e ta considera e benchmarknan posibel of si nan mester ser revisa. Den un revision conhunto na october ultimo, e instancianan aki a analisa e normanan pero na final a dicidi contra di ahusta nan.

Un rapport interno di e reunion ey, obteni pa Nieuwsuur, ta bisa: “A indica cu e normanan actual ta socialmente aceptabel. Ahusta nan debi na presion profesional interno no ta ser mira como e miho opcion. Sinembargo, ta importante pa evalua con e normanan aki por ser comunica miho internamente pa preveni demotivacion bou di empleadonan.”

Geerte Beijer, hefe di e unidad di crimen sexual na Limburg, a bisa cu priorisa casonan ta keda un reto grandi. “Ora tin mucho caso, priorisa ta bira hopi dificil. Y esey ta presenta un dilema etico grandi. Kico ta hustifica priorisa un caso di violacion riba otro? Esey ta un decision dificil, pero e ta e realidad.”

E cantidad grandi di casonan hopi biaha ta obliga investigadornan pa limita nan esfuersonan, particularmente den casonan di abuso online, cu por envolve varios victima. “Na cierto momento, bo mester bisa: nos ta stop mas investigacion, stop di identifica mas victima, y sigui padilanti cu e caso den corte,” Monster a bisa.

Sosten pa Victima Hulanda ta reconoce e dilema aki. “E reto pa e proximo añanan ta con pa maneha e cantidad creciente di victima den proceduranan penal,” Jansen a bisa. El a argumenta cu no mester laga e tipo di decisionnan ey solamente na polis of OM. “Esaki ta rekeri un debate publico mas amplio. Si bo exclui cierto victimanan for di e proceso hudicial, bo ta nenga nan derechonan. Esey ta un decision grandi.”

Minister di Husticia y Seguridad David van Weel a contesta declarando cu faltando e metanan no necesariamente ta indica fracaso dentro di e sistema di husticia penal. “Un meta ambicioso ta encurasha innovacion den mehoracion di tempo di procesamento di caso. Mes importante ta garantisa un control mas grandi pa victimanan den casonan di crimen sexual,” el a bisa.